ShQO-da oblystyq máslıhattyń jańa hatshysy saılandy

ÓSKEMEN. QazAqparat - Búgin Óskemende jetinshi shaqyrylǵan oblystyq máslıhattyń birinshi sessııasy ótti. Sessııa barysynda depýtattar ShQO máslıhatynyń jańa hatshysyn saılady. Bul qyzmetke buǵan deıin oblystyń dene shynyqtyrý jáne sport basqarmasynyń basshysy qyzmetin atqarǵan Denıs Rypakov taǵaıyndaldy, dep habarlaıdy QazAqparat ShQO ákiminiń baspasóz qyzmetine silteme jasap.

Aımaq basshysy Danıal Ahmetov burynǵy depýtattyq quramǵa jemisti birlesken jumys úshin shyn júrekten alǵysyn bildirip, jańa jaǵdaıda barlyq deńgeıdegi maslıhattardyń jalpy saıası róli men jaýapkershiligi artyp otyrǵanyn atap ótti.

- Men depýtattyq korpýstyń jańartylǵan quramy oblysymyzdyń odan ári damýy men órkendeýi jolynda aıanbaı eńbek etetinine senemin. Partııaaralyq ózara is-qımyldy kúsheıtý, barlyq fraktsııalardyń úılesimdi jumysyna qol jetkizý qajet. Oblystyq máslıhattyń barlyq depýtattary, qandaı partııaǵa jatatynyna qaramastan, ózderiniń saılaýaldy baǵdarlamalary men saılaýshylarǵa bergen ýádelerin oryndaýǵa belsendi kirisetinine senimdimin, - dep atap ótti Danıal Ahmetov.

Otyrysta jańa saılanǵan depýtattyq korpýs sondaı-aq, tórt turaqty komıssııany qurý jáne quramyn tańdaý máselesin qarastyrdy. Jalpy ShQO aýmaqtyq saılaý komıssııasynyń tóraǵasy Ersaın Nábıevtiń aıtýynsha, bıylǵy saılaýda depýtattyq korpýs aıtarlyqtaı jańartylǵan. Depýtattar arasynda qoǵam qaıratkerleri, iri kásiporyndardyń, sharýa qojalyqtarynyń basshylary bar.

Aıta keteıik, oblystyq máslıhattaǵy depýtattyq mandattar saılaýshylar daýysynyń jeti jáne odan da kóp paıyzyn alǵan saıası partııalar arasynda bólingen. Osylaısha, «Nur Otan» partııasy 32 mandat, «Aýyl» halyqtyq-demokratııalyq patrıottyq partııasy men «Aq jol» QDP-nda 3 mandattan.