ShQO-da Nurjan Bajekenovtyń alǵashqy jeke kontserti ótti

NUR-SULTAN. QazAqparat - Óskemen qalasyndaǵy oblystyq drama teatrynda «Týǵan jerge taǵzym» atty kontsert ótti, dep habarlaıdy QazAqparat oblystyq ákimdiktiń baspasóz qyzmeti.

Abaı atyndaǵy Memlekettik akademııalyq opera jáne balet teatrynyń jetekshi solısti, halyqaralyq jáne respýblıkalyq konkýrstardyń laýreaty, Óskemenniń týmasy Nurjan Bajekenovtyń bul alǵashqy jeke kontserti.

Kontsert «Rýhanı jańǵyrý» baǵdarlamasyn iske asyrý aıasynda ShQO ákimdiginiń uıymdastyrýymen ótti. Mýzykalyq keshke «Qurmet» ordeniniń ıegeri, bas dırıjer Aleksandr Galsanovtyń basqarýyndaǵy ShQO ákiminiń sımfonııalyq orkestri súıemeldeý jasady. Kontserttik baǵdarlamada Abaı atyndaǵy memlekettik akademııalyq opera jáne balet teatrynyń solısi, N. Bajekenovtyń jubaıy Venera Alpysbaeva, QR eńbek sińirgen ártisi, «Qurmet» ordeniniń ıegeri Vıacheslav Tkach jáne Qurmanǵazy atyndaǵy Qazaq ulttyq konservatorııasynyń túlegi, «Ertis kontsert» mekemesiniń ánshisi Janat Bısımbaevtar ónerlerin kórsetti.

Kesh shymyldyǵy ShQO ákiminiń sımfonııalyq orkestriniń oryndaýyndaǵy «Daırabaı» kúıimen ashylyp, ary qaraı kórermender nazaryna N. Tilendıevtyń «Jan Sáýlem», Dj. Pýchchınıdiń arııasy Kavaradossı operasynan «Toska», N. Bajekenov, V. Tkach jáne J. Bısımbaevtyń oryndaýlarynda álemge áıgili P. Chaıkovskııdiń «Evgenıı Onegın» arııasy usynyldy. Sh. Qaldaıaqovtyń «Aq mańdaılym», orys halyq áni «Ah, ty dýshechka», S.Abdınýrovtyń «Turan» sımfonııalyq dastany jalǵasyn tapty. N. Bajekenovpen V. Alpysbaevanyń F. Legara «Strana ýlybok» operasy, F. Sartorı «Con te Partiro» jáne álem mýzykasynyń ozyq úlgilerin tyńdaýǵa múmkindik berip, sonymen qatar Uly aqyn, jazýshy Abaıdyń 175 jyldyǵyna oraı «Aıttym sálem, Qalamqas» shyǵarmasy qoıyldy.

Óziniń týǵan qalasynda qazirgi Memlekettik akademııalyq opera jáne balet teatrynyń ártisteri jerlesterin ónerimen, klassıkalyq áýenderimen qýantty jáne kórermenderdiń júreginde erekshe oryn alatyn umytylmas kesh syılady. Ataqty opera ánshileriniń kontsertinde zal kórermenderge lyq toly boldy. Kesh sońynda ártister barlyq kelgen kórermenderge, sımfonııalyq orkestrdiń mýzykanttaryna, bas dırıjer Aleksandr Galsanovqa týyndylardy kásibı joǵary oryndaǵany úshin alǵys aıtty, sondaı-aq oblys ákimdigi men mádenıet basqarmasynyń basshylyǵyna óńirdegi mádenıet jáne óner salasyn damytýǵa erekshe kóńil bólingeni úshin úlken alǵystaryn bildirdi.

Kontsertke kirý tegin boldy.