ShQO-da nysandardyń qysqa daıyndyǵy 50 paıyzdan assa da, úılerdiń ázirligi aqsap tur

ÓSKEMEN. KAZINFORM – Sát sanap jylytý maýsymynyń bastalýy jaqyndap keledi. Alaıda Shyǵys Qazaqstan oblysyndaǵy kópqabatty turǵyn úılerdiń basym bóligi qys mezgiline daıyndyq synaǵynan áli ótpegen. 

Oblys boıynsha jylytý maýsymyna daıyndyq deńgeıi 50 paıyzdan asyp otyr. Dese de kópqabatty úılerdiń ázirligi máz emes.

3 myńnan astam kópqabatty úıdiń tek ár besinshisi ǵana synnan súrinbeı ótken. Bul degenimiz, myńdaǵan otbasy kúzdiń alǵashqy sýyǵyn jylýsyz qarsy alýy múmkin. Energetıka salasyndaǵy mamandardyń aıtýynsha, daıyndyqty kúzge ysyra beretinderdiń jylýǵa kesheýildep qosylýy ǵajap emes.

Al energetıkalyq nysandardaǵy jaǵdaı turaqty. Jylý elektr ortalyqtarynyń daıyndyǵy — 47%. Qazandyqtar men týrboagregattar boıynsha kórsetkish 46–48% aralyǵynda. Sý elektr stantsııalarynda jóndeý jumystarynyń jartysyna jýyǵy oryndalǵan.

— 537 shaqyrym elektr jelisiniń 199 shaqyrymy kúrdeli jóndeýden ótti. 39 qosalqy stantsııanyń 22-si jańǵyrtyldy. Avtonomdy qazandyqtar boıynsha daıyndyq 59%, — deıdi oblystyq Energetıka jáne TÚKSh basqarmasy basshysynyń orynbasary Raýan Turysbek.

Eske salsaq, osyǵan deıin Shyǵys Qazaqstanda káriz júıeleriniń jartysynan astamy tozyp turǵany habarlanǵan.