ShQO-da naızaǵaı túsip, 16 jastaǵy jetkinshek kóz jumdy
NUR-SULTAN. QazAqparat – Tótenshe jaǵdaı komıtetiniń málimetinshe ótken aptadaǵy demalys kúnderi ártúrli tótenshe oqıǵanyń saldarynan 5 bala kóz jumyp, 6 bala ártúrli dene jaraqatyn alǵan, dep habarlaıdy QazAqparat tilshisi.
Komıtettiń habarlaýynsha 14 maýsymda Shyǵys Qazaqstan oblysy Abaı aýdanynyń Qasqabulaq aýylynda atpen qoı jaıyp júrgen 2004 jyly týǵan balaǵa naızaǵaı túsip, mert bolǵan. Al Qyzylorda oblysynyń Shıeli aýdany Balabı aýylynda úlkenderdiń qaraýynsyz esik aldynda elektr symymen oınap júrgen bala toqqa túsken. 220V toqqa túsken 2017 jylǵy bala aýrýhanada kóz jumdy. Dál sol kúni Pavlodar oblysynyń Aqqýly aýdany Aqqýly aýylynda bir jastaǵy bala 3 metrlik qudyqqa túsip ketken. Qutqarýshylar kelgenshe balany kórshiler qutqaryp alyp, aýrýhanaǵa jetkizgen.
«13 maýsymda saǵat 22.38 ýaqytynda Kókshetaý qalasyndaǵy 5 qabattyq úıdiń ekinshi qabatyndaǵy páterinen órt shyǵyp, úıdegi jıhazdar órtendi. Saǵat 22.56 kezinde tilsiz jaý aýyzdyqtaldy. Oqıǵa ornynan 2012, 2014 jáne 2016 jylǵy úsh bala aýrýhanaǵa jetkizilip, onyń bireýi sonda jan tapsyrdy. Dál sol kúni Nur-Sultan qalasynyń Esil aýdanynda bir jastaǵy bala podezdiń 8 qabatynan úshinshi qabatyndaǵy baspaldaqqa qulap, aýrýhanaǵa jetkizildi», - delingen habarlamada.
13 maýsymda Shymkenttegi Abaı aýdanyndaǵy Samal-3 shaǵyn aýdanynda bir jastaǵy bala sýǵa tunshyǵyp kóz jumsa, Atyraýda 2014 jylǵy qyz bala 2 metrlik shuńqyrǵa túsip jan tapsyrǵan. Qaraǵandyda sol kúni ekinshi qabattan 3 jastaǵy qulap ketip, emhanaǵa jetkizilgen.
Osy jaǵdaılardy tize kele QR ІІM TJK mamandary balalardy qaraýsyz qaldyrmaý kerektigin eskertedi.
