ShQO-da myńǵa jýyq volonter qarttarǵa kómektesýde - Araılym Esimbekova
- Juqpaly derttiń jaıylýyna tosqaýyl qoıý maqsatynda elimizde tótenshe jaǵdaı jarııalandy. Óskemen men Semeı qalalarynda qosymsha shekteýler engizilip, jurttyń sebepsiz kóshege shyǵýyna tyıym salyndy. Osyndaı qysyltaıań kezde óńir volonterleri qalaı áreket etýde?
- Álemdi ábigerge salǵan koronavırýstyń taralý qaýpin báseńdetý úshin Prezıdentimiz Qasym-Jomart Toqaevtyń qabyldaǵan sheshimderi áste durys. Shyǵys Qazaqstannyń negizgi eki qalasy – Óskemen men Semeıde 2 sáýirden bastap turǵyndar úıden tek ruqsat qaǵazymen shyǵýda. Onda da dúkenge, dárihanaǵa, bankke ǵana bara alady. Mundaı shekteýlerge túsinistikpen qaraǵanymyz abzal. Tótenshe jaǵdaı kezinde volonterler talaı ıgi sharalarǵa bilek sybana qatysyp jatyr. Atap aıtqanda, qarttar men múgedekterge eń qajet zattardy úıge deıin jetkizip berýde. Olarǵa telefon arqyly tapsyrys berse bolǵany. Baılanys ortalyǵynyń mamandary ótinishterdi 07.00-den bastap 19.00-ge deıin qabyldaıdy.
Atalǵan eki shaharǵa kirý-shyǵý joldary jabylyp, blokposttar qoıylǵan. Kún demeı, tún demeı eńbek etip júrgen quqyq qorǵaý organdary men medıtsına salasynyń mamandaryna, áskerı qyzmetkerlerdiń moınyna úlken jaýapkershilik júktelgeni aıtpasa da túsinikti. Olarǵa qoldaý kórsetý maqsatynda shyǵysqazaqstandyq jastar «Jylý syıla» aktsııasyn uıymdastyrdy. Sóıtip, 15 volonter blokposttardaǵy qyzmetkerlerge ystyq shaı men baýyrsaq taratty. Sonymen qatar eriktilerimiz tártip saqshylarymen birge turǵyndarǵa tótenshe jaǵdaı kezindegi shekteýler týraly túsindirý jumystaryn da júrgizgen. Shara barysynda júrgizýshilerge koronavırýs ınfektsııasynan saqtanýdyń joldary kórsetilgen jadynamalar taratyldy. Túsindirý jumystary demekshi, óskemendik volonterler qaýipti derttiń aldyn alý sharalary týraly ázirlengen oblystyq «Dıdar» jáne «Rýdnyı Altaı» gazetteriniń arnaıy shyǵarylymdaryn iri saýda oryndaryndaǵy, dúkender men bazarlardaǵy halyqqa usyndy. Keıinnen bul aktsııany oblysymyzdyń basqa qalalar men aýdandaryndaǵy volonterlik shtabtar da qoldady.
- Eriktiler tarapynan medıtsına qyzmetkerlerine qandaı da bir qoldaý kórsetildi me?
- Koronavırýs keselimen damyl kórmeı kúresip jatqan dárigerler qandaı qurmetke de laıyq. Taıaýda volonterler «Emıl» zaýytymen birlesip Óskemendegi №4 qalalyq aýrýhananyń aq halattylaryna ımmýnıtet kóteretin sút ónimderi men jemis-jıdekter apardy. «Maıdan shebinde» júrgen medıtsına qyzmetkerlerine eldiń atynan rızashylyqtaryn bildirip, hat ta jazdy.
- Jalpy oblys boıynsha osyndaı sharalarǵa qansha volonter tartylǵan?
- Qazirgi ýaqytta óńirimizde 1000-ǵa jýyq erikti túrli sharalarǵa atsalysýda. Onyń ishinde Óskemende 110, Semeıde 70 adam azyq-túlik tasymalymen aınalysýda. Olar medıtsınalyq maskalarmen, kolǵaptarmen, qorǵanys kostıýmderimen jáne antıseptıktermen tolyqtaı qamtamasyz etilgen. Eriktiler qataryna qosylǵysy kelgender oblystyq Jastar resýrstyq ortalyǵyna habarlasyp jatady. Volonterlik qyzmet adamnyń jasyna, jumys ornyna qaramaıdy. Eń bastysy, izgi júrek pen bireýge tıtteı de bolsyn paıdamdy tıgizsem degen aq nıet kerek.
- Alda qandaı josparlaryńyz bar?
- Osymen toqtap qalmaı basqa da izgi maqsattaǵy sharalar qolǵa alynady. Onyń biri – «Qaıyrymdy kórshiler» aktsııasy bolmaq. Shynyn aıtqanda, eriktiler muqtaj jandardyń barlyǵyn anyqtaı almaıdy. Sol úshin halyqqa «Óz kósheńizdegi qazynaly qarttarǵa, múgedekterge sizdiń kómegińiz qajet. Eger dúkenge bara jatsańyz, olardyń kerek zattaryn ala kelseńiz nur ústine nur bolady» dep áleýmettik jeliler arqyly beınerolıkter taratyp, saýapty iske shaqyrýdamyz. Osyndaı syn saǵatta volonterler judyryqtaı jumylyp jumys isteýde. Tipti olardyń arasynda az qamtylǵan otbasylarǵa qarjylaı qoldaý kórsetip jatqandar bar.
- Oblys jastaryna qandaı baǵa berer edińiz?
- Bizdiń jastar óte saýatty, belsendi. Sheshim qabyldamas buryn jeti ret ólshep, bir ret kesedi. Stýdentterdiń ózderi jeke kásippen aınalysyp júredi. Bir ornynda toqtamaı, alǵa umtylatyn osyndaı jastardy kórgende jan saraıym jadyrap, keýdemdi qýanysh kerneıdi. Sebebi elimizdiń álemdik arenada nyq ornyǵýy osy óskeleń urpaqqa tikeleı baılanysty ǵoı. Maǵjan Jumabaev aıtqandaı «arystandaı aıbatty, jolbarystaı qaıratty» jastarǵa men de senemin!
- Suhbatyńyzǵa kóp raqmet!