ShQO-da muzdy sýǵa batyp ketken áıeldiń denesi tabyldy

ÓSKEMEN. QazAqparat – Shyǵys Qazaqstan oblysynda súńgýirler muz astyna túsip ketken áıeldiń denesin tapty, dep habarlaıdy QazAqparat tilshisi.

«8 jeltoqsanda túski ýaqytta áıeldiń denesi tabyldy. Barlyǵy 9 ret sý astyna túsý jumystary júrgizildi. Sýdyń tereńdigi – shamamen 20 metr. Іzdeý jumystaryna jeke quramnan 23 adam men 7 tehnıka jumyldyrylǵan, - delingen aqparatta.

Súńgýirlerge marqumnyń denesin jyldam tabýǵa aýanyń tómen temperatýrasy men sý astyndaǵy qarańǵylyq qıyndyq keltirgen.

Eske salsaq, osyǵan deıin ShQO-da bes adam mingen kólik muz astyna túsip ketip, bir jolaýshy kóz jumǵany habarlanǵan.

ShQO Tótenshe jaǵdaılar departamenti baspasóz qyzmetiniń málimetine súıensek, 6 jeltoqsan kúni saǵat 19:44 kezinde Samar aýdanyndaǵy Buqtyrma sý qoımasynda 5 adam otyrǵan kólik muz astyna qulaǵan. Tórteýi kólikten shyǵyp úlgerip, 1950 jyly týǵan áıel adam sýǵa batyp ketken.