ShQO-da muz jarylyp, balyqshylar kóligimen birge sýǵa túsip ketti
KÚRShІM AÝDANY. QazAqparat - Shyǵys Qazaqstan oblysynyń Kúrshim aýdanynda muz jarylýy saldarynan kóligimen birge sýǵa túsip ketken balyqshylar qutqaryldy, dep habarlaıdy QazAqparat ShQO Tótenshe jaǵdaılar departamentine silteme jasap.
Departamenttiń málimetterine qaraǵanda, 28 jeltoqsanda «112» qutqarý telefonyna kólikteri sýǵa ketken balyqshylar kómek surap, qońyraý soqqan.
Oqıǵa ornyna Kúshim aýdanynyń jedel qutqarý jasaǵynyń 9-bólimshesi shyqty. Qutqarý stantsııasynan 20 shaqyrym jerde Kúrshim aýyldyq okrýginiń «Chonobaı» ýchaskesinde qutqarýshylar sýǵa batqan kólikti baıqap qaldy. Balyqshylar kólikten ózdiginen shyqqan, alaıda malmandaı sý bolǵan.
«Kólik tereńge batpapty, jaǵalaýǵa jaqyn jerde eken. Qutqarýshylar ony sýdan alyp shyǵýǵa kómektesti. Shemonaıha aýdanynyń 3 balyqshysy Kúrshim aýylyna jetkizildi, medıtsınalyq kómekke muqtaj emes. Qutqarý stantsııasynda olar jylynyp, kıimderin keptirip, túnep shyqty. Balyqshylarǵa kólikpen muzǵa shyqpaý týraly taǵy da eskertemiz, ony jaǵada qaldyryńyz. Jolaýshylar úshin qaýipsiz muz 7 sm bolsa, kólik úshin 20 sm. Muzǵa tek kúndiz shyǵyńyz. Muz arasyndaǵy shópter, aryq, qalyń qar basqan oryndardan saq bolyńyz. Ózińizben birge mindetti túrde uıaly telefon, qosymsha kıim alyńyz»,-delingen habarlamada.
