ShQO-da muz ústinde qaýipsizdik erejelerin saqtamaǵan 70-ten astam adam jaýapqa tartyldy

ÓSKEMEN. KAZINFORM – Shyǵys Qazaqstan oblysynda qutqarýshylar azamattarǵa muzdaǵy qaýipsizdik erejelerin eske saldy.

ShQO tótenshe jaǵdaılar departamenti baspasóz qyzmetiniń málimetine súıensek, qys bastalǵaly beri mamandar muz aıdyndaryna 1 500 ret reıdke shyqty. 

– Sonyń nátıjesinde muz ústinde qaýipsizdik erejelerin saqtamaǵan 72 adam anyqtalyp, jaýapqa tartyldy. Halyqqa qaýipsizdik talaptary túsindirilip, jadynamalar taratyldy, - delingen aqparatta. 

Qutqarýshylar halyqqa muzdyń jetkilikti deńgeıde qalyń ekenine senimdi bolmaǵan jaǵdaıda, onyń ústimen júrmeý qajettigin eskertti. 

Muz jaǵalaýda berik bolady. Onyń qalyńdyǵy jaǵadan alystaǵan saıynǵy tereńdikte juqarady. Muzdyń beriktigi aýa temperatýrasyna da baılanysty. Kúndiz ol tańerteń jáne keshki ýaqyttaǵy sııaqty berik bolmaıdy.

Muz ústimen júrgen kezde qalyń qarmen jabylǵan ýchaskelerdi, sý jyldam aǵatyn jerlerdi aınalyp ótý qajet.

Eske salsaq, buǵan deıin Qaraǵandy oblysynda qutqarýshylar qar qursaýynda qalǵan 12 adamdy qutqarǵany jaıly habarlanǵan.