ShQO-da múmkindigi shekteýli azamattarǵa «ınvataksı» 3 jyl boıy qyzmet kórsetpegen — prokýratýra

ÓSKEMEN. KAZINFORM Shyǵys Qazaqstan oblysynda prokýrorlar Samar aýdanynda múmkindigi shekteýli azamattarǵa «ınvataksı» qyzmeti 3 jyl boıy qoljetimsiz bolyp kelgenin anyqtady. 

Aýdan prokýratýrasy múgedektigi bar azamattar quqyqtarynyń saqtalýyna taldaý júrgizdi. Sonyń nátıjesinde 39 adamnyń, sonyń ishinde 7 balanyń «ınvataksı» qyzmetine muqtaj ekeni anyqtaldy.

— 2022 jyldan beri Samar aýdanynda memlekettik áleýmettik tapsyrys arqyly «ınvataksı» qyzmeti júzege asyrylmaı kelgen. Aýdan ákimdigimen tutynýshylar sanatyn jáne tizbesin keńeıtý týraly qaýly qabyldanbaǵan. Aýdan prokýratýrasynyń usynysy boıynsha ákimdik múmkindigi shekteýli adamdarǵa kólik qyzmetteriniń qoljetimdiligin qamtamasyz etý jóninde sharalar qabyldady, — delingen aqparatta.

Osylaısha, bıýdjetten 27 mln teńge bólinip, múmkindigi shekteýli adamdardy tasymaldaýǵa arnalǵan arnaıy avtokólik satyp alyndy. Sondaı-aq turaqty túrde kólik qyzmetin kórsetý úshin júrgizýshi jumys orny ashyldy.

Eske salsaq, osyǵan deıin ShQO-da jer qoınaýyn paıdalaný talaptaryn buzǵan kásiporyndarǵa aıyppul salynǵany habarlanǵan.