ShQO-da muqtaj otbasylar turatyn úılerdiń jartysyna jýyǵynda órt qaýipsizdigi saqtalmaǵan

ÓSKEMEN. KAZINFORM – Shyǵys Qazaqstan oblysynda áleýmettik turǵyda osal otbasylar turatyn jer úılerdiń jartysyna jýyǵynda órt qaýipsizdigi erejeleri saqtalmaǵan.

ShQO Tótenshe jaǵdaılar departamenti baspasóz qyzmetiniń málimetine súıensek, tamyz aıynan halyqtyń áleýmettik turǵyda osal toptary turatyn jeke turǵyn úılerge tekseris bastaldy.

Barlyǵy 3101 úıge baqylaý júrgizildi. Sonyń nátıjesinde, 1379 úıde órt qaýipsizdigi talaptarynyń buzylǵandyǵy anyqtaldy.

«Onyń ishinde peshti paıdalaný erejelerin buzý - 617, elektr jelileri men elektr jabdyqtaryn talapqa saı paıdalanbaý - 540 jáne basqa sıpattaǵy erejelerdi buzý - 227. Osy úılerdiń ıelerine túsindirý jumystary júrgizildi», - delingen aqparatta.

Vedomstvo ókilderiniń dereginshe, 3101 úıdiń 946-syna ýly gazdy anyqtaıtyn datchık ornatylmaq. Búgingi tańda 251 datchık ornatylǵan.

«Segiz aıda óńir boıynsha jeke turǵyn úılerde shyqqan órtterdiń sany 13%- ǵa, órt kezinde qaza bolǵandar sany 22%-ǵa azaıǵan. Alaıda kómirtegi totyǵymen ýlaný 4,7%-ǵa, ýlanyp qaıtys bolǵandar sany 25%-ǵa ósken», - delingen habarlamada.