ShQO-da muqtaj otbasylar turatyn 1300-den astam úıde órt qaýipsizdigi erejeleri saqtalmaǵan

ÓSKEMEN. KAZINFORM – Shyǵys Qazaqstan oblysynda áleýmettik turǵyda osal sanattaǵy otbasylar turatyn 1300-den astam jer úıde órt qaýipsizdigi erejeleri saqtalmaǵan.

ShQO tótenshe jaǵdaılar departamenti baspasóz qyzmetiniń málimetine súıensek, óńir aýmaǵynda órt qaýipsizdigi aılyǵy ótkizilip jatyr. 

«Jyl saıyn jylytý kezeńinde oblysta 300-ge jýyq órt bolady. Kóp jaǵdaıda ottyń shyǵý sebebi – qaýipsizdik erejeleriniń saqtalmaýynan. Soǵan oraı aılyq aıasynda halyqqa jan-jaqty túsindirý jumystary júrgizilýde. Birinshi kezekte áleýmettik turǵyda osal sanattaǵy otbasylar turatyn úıler tekserildi», - deıdi ShQO TJD memlekettik órt baqylaý basqarmasynyń bastyǵy Nurjan Ómirjanov. 

Qutqarýshylar barlyǵy 3101 úıge bardy. Nátıjesinde, 1304 úıde órt qaýipsizdigi erejeleriniń buzylǵandyǵy anyqtaldy. Onyń ishinde 597-i peshpen jylytýǵa baılanysty, 515-i elektr jabdyqtaryn talapqa saı paıdalanbaý, 198-i basqa sebepter. Jeke turǵyn úı sektorynda aılyqty ótkizýge qatysý úshin azamattyq qorǵaý organdarynan basqa aýdandyq polıtsııa bólimderiniń qyzmetkerleri, eriktiler jáne jergilikti atqarýshy organdar jumyldyrylǵan. 

Úılerdi aralaý barysynda ýly gazdy anyqtaıtyn datchıkter ornatylyp jatyr. Sońǵy jyldary óńirde barlyǵy 15 myńǵa jýyq datchık ornatylǵan. Olar 42 adamnyń, onyń ishinde 32 balanyń ómirin saqtap qaldy.