ShQO-da múgedektigi bar jandarǵa arnalǵan arbalardy jalǵa berý júıesin engizý usynyldy
ÓSKEMEN. KAZINFORM — Shyǵys Qazaqstan oblysynda múmkindigi shekteýli jandardy tehnıkalyq ońaltý quraldarymen qamtamasyz etýdiń jańa tásili talqylanyp jatyr. Naqty aıtqanda, qymbat quraldardy satyp almaı-aq, ýaqytsha paıdalanýǵa berý júıesi usynyldy.
Múgedektigi bar jandarǵa arnalǵan arbalardy satyp alýdyń ózi talaı otbasy úshin úlken shyǵyn sanalady. Al oqý, jumys isteý jáne óz betinshe ómir súrýge arnalǵan arnaıy quraldardyń quny budan áldeqaıda joǵary.
Mysaly, tıflokeshenniń baǵasy 900 myń teńgeden birneshe mln teńgege deıin jetedi. Bul jaı ǵana kompıýter emes, kórý qabileti buzylǵan adamdarǵa arnalǵan tolyqqandy jumys orny dese de bolady. Onyń quramyna mátindi dybystaıtyn baǵdarlamalar, úlkeıtkish qurylǵylar, Braıl júıesine arnalǵan quraldar jáne ózge de arnaıy tehnıkalar kiredi.
Osy sanatqa ózge de qymbat ońaltý quraldary — kreslo-arbalar, júrip-turýǵa arnalǵan qurylǵylar, kótergishter, arnaıy qozǵalys nemese oqý qurylǵylaryn jatqyzýǵa bolady. Mundaı jabdyqtardyń bir bóligi ýaqyt óte kele paıdalanylmaı qalsa, dál sol sátte basqa adamdarǵa asa qajet bolýy yqtımal.
— Búginde keıbir qural-jabdyqtardyń bos jatqanyn kórip otyrmyz. Al ony dál qazir qajet etip turǵan, biraq qymbat bolǵandyqtan satyp ala almaıtyn adamdar bar. Sondyqtan jalǵa berý tetigi qarastyrylyp jatyr. Iesi paıdalanbaı turǵan quralyn ýaqytsha qoldanysqa bere alady, al múmkindigi shekteýli jan qajetti quraldy artyq shyǵynsyz paıdalaný múmkindigine ıe bolady, — dedi Halyqty áleýmettik qorǵaý salasyndaǵy retteý jáne baqylaý komıteti ShQO boıynsha departamenti basshysynyń mindetin atqarýshy Natalıa Lıtke.
Onyń aıtýynsha, mundaı tásil eki tarapqa da tıimdi bolýy múmkin. Qural ıesi ony joǵaltpaıdy, al oǵan muqtaj adam qajetti ońaltý quralyn dál kerek kezinde paıdalana alady.
Qazirgi tańda bastama talqylaý kezeńinde. Eger joba júzege assa, óńirde tehnıkalyq ońaltý quraldaryna qol jetkizýdiń neǵurlym ıkemdi tetigi qalyptasýy múmkin, ıaǵnı, quraldardy tek satyp alý arqyly ǵana emes, ýaqytsha paıdalaný arqyly da alý múmkindigi paıda bolady.
Eske salsaq, osyǵan deıin múgedektigi bar azamattarǵa arnalǵan tehnıkalyq quraldardy paıdalaný tártibi jańaratyndyǵy habarlanǵan.
