ShQO-da múgedekter qatelesip bıýdjetke 40 mıllon teńge tólep qoıǵan
ASTANA. QazAqparat - ShQO prokýratýrasy múmkindigi shekteýli jandardyń tóleýden bosatylǵanyna qaramastan túrli salyqtar men alymdardy uzaq ýaqyt boıy bıýdjetke tólep kelgenin anyqtady, dep habarlaıdy «QazAqparat» HAA tilshisi ShQO prokýratýrasynyń baspasóz qyzmetine silteme jasap.
Naqtyraq aıtqanda, quzyrly organnyń qyzmetkerleri taldaý barysynda 2015 jyldyń qańtary men 2017 jyldyń maýsymy aralyǵynda óńirdiń 12 128 múgedegi memleket qazynasyna 40 mıllıon teńge shamasynda tólem jasaǵanyn anyqtaǵan. Tólemder múgedekterdiń olardan zańmen bosatylǵanyna qaramastan jasalǵan. Qarastyrylyp otyrǵan ýaqyt aralyǵynda múgedekter jer jáne múlik salyǵyn, múlikti memlekettik tirkeý alymdary men ózge memlekettik bajdardy bıýdjetke ótep kelgen.
«Zań boıynsha múgedekter negizsiz memleket qazynasyna aqsha tólemderin jasasa, bul aqsha somalary múgedektiń aryzy negizinde qaıtarylýǵa jatady. ShQO prokýratýrasy bilmestikpen bıýdjetke tólem jasaǵan múgedekterge aýmaqtyq memlekettik kiris organdaryna júginýge shaqyrady. Memlekettik baj tólemderin qaıtarý ótken 3 jyl, salyqtar sońǵy 5 jyl boıynsha qaıtarylady», - dep habarlaıdy vedomstvodan.
Tólengen salyq tólemderin qaıtarý úshin múgedekterge aýmaqtyq memlekettik kirister organdaryna júginý qajet. Alymdar men memlekettik baj somalaryn qaıtarý úshin tirkeý nemese ruqsattama jumysyn júrgizgen organdardan tólemdi qaıtarý negizdiligi boıynsha qorytyndy alyp, sońynan salyq organyna barýǵa bolady.
«Tólemdi qaıtarý aryzymen birge banktegi esep-shottyń barlyǵyn rastaýshy qujat pen tólemniń jasalǵanyn rastaıtyn túbirtektiń túpnusqasy jáne kóshirmesi qajet», - dep habarlaıdy prokýratýradan.
