ShQO-da muǵalimniń quqyǵyn buzǵandarǵa aıyppul salynýy múmkin
ÓSKEMEN. QazAqparat – Shyǵys Qazaqstan oblysynda muǵalimniń quqyǵyn buzǵanǵa 120 AEK-ke deıin aıyppul salynýy múmkin, dep habarlaıdy QazAqparat tilshisi.
Bir jyldan astam ýaqyt buryn elimizde «Pedagog mártebesi týraly» zań qabyldanǵan bolatyn. Osynyń arqasynda muǵalimder artyq jumystan arylyp, óz quqyqtaryn qorǵaı alýda. Al Shyǵys Qazaqstanda bul zańnyń saqtalýyn qadaǵalaý óńirlik Bilim salasyndaǵy sapany qamtamasyz etý departamentine júktelgen.
«Ustazdardyń quqyqtaryn buzǵan laýazymdy tulǵalar men uıymdardy ákimshilik jaýapkershilikke tartýǵa quqyǵymyz bar. Zań boıynsha olarǵa 20-dan 120 AEK-ke deıin nemese 58 myńnan 350 myń teńge aralyǵynda aıyppul salynady. Sonymen qatar osy jyldyń 14 qańtarynda QR Bilim jáne ǵylym mınıstri Ashat Aımaǵanbetovtiń tapsyrmasyna sáıkes, pedagogıkalyq etıka jáne bilim berý uıymdary muǵalimderiniń quqyqtaryn qorǵaý máselelerine oraı departamenttiń janynan konsýltatıvtik-keńesshi organ quryldy. Onyń quramyna qalalyq máslıhat depýtattary, memlekettik organdardyń, ShQO Qoǵamdyq keńesiniń, BAQ jáne úkimettik emes uıymdardyń ókilderi kirdi», - dedi departament basshysy Zeınep Maqsutova.
Onyń aıtýynsha, konsýltatıvtik-keńesshi organnyń jumysy barysynda bilim berý uıymdary basshylarynyń «Pedagog mártebesi týraly» zań men etıka erejeleriniń normalaryn saqtaýy, usynystary men máseleleri qaralady.
«Mektepterde, balabaqshalar men kolledjderde muǵalimderdiń qyzmetindegi esep berý men qaǵazbastylyqty azaıtýǵa basymdyq berilgen. Álbette, 2018 jylmen salystyrǵanda osy turǵyda aıtarlyqtaı jaqsy nátıjeler baıqalady. Biraq soǵan qaramastan baqylaýdy kúsheıtken jón», - dedi departament basshysy.
