ShQO-da muǵalimderdi attestatsııadan ótkizemiz dep aqsha alǵandar sottaldy

ÓSKEMEN. QazAqparat – Shyǵys Qazaqstan oblysynda muǵalimderdi attestatsııadan ótkizemiz dep aqsha alyp kelgen 4 memlekettik qyzmetker sottaldy, dep habarlaıdy QazAqparat tilshisi.

Óskemen qalalyq №2 sotynda ShQO Bilim basqarmasy mektepke deıingi jáne jalpy orta bilim berý bóliminiń basshysy, atalǵan vedomstvonyń personaldy basqarý qyzmetiniń basshysy, aýdandyq bilim bóliminiń basshysy jáne bas mamanyna qatysty qylmystyq is qaraldy.

Aldyn ala sóz baılasqan olar qyzmettik ókilettikterin paıdalanyp, muǵalimderge attestatsııadan ótýge jáne tıisti biliktilik sanatyn alýǵa járdemdesemiz dep jalpy somasy 2 930 000 teńge paıda kórgen. Bir ustazdan 150-200 myń teńge mólsherinde aqsha alyp otyrdy.

Muǵalimder aqshany sottalýshylardyń tanystary men týystarynyń banktegi shotyna jibergen. Sot barysynda eks-memlekettik qyzmetkerler óz kinálaryn moıyndap, jeńil jaza taǵaıyndaýdy surady.

«Sot jeńildetetin mán-jaılardy eskere otyryp, 3 aıyptalýshyǵa 13 mln 300 myń, 6 mln jáne 4 mln 500 myń teńge mólsherinde aıyppul saldy. Al úsh jylǵa bas bostandyǵynan aıyrylǵan tórtinshi sottalýshynyń kámelettik jasqa tolmaǵan balasy bar bolǵandyqtan úkimniń oryndalýy bes jylǵa shegerildi. Sondaı-aq olardyń barlyǵy ómir boıy memlekettik qyzmette jumys isteý quqyǵynan aıyryldy», - dep habarlady sottyń baspasóz qyzmeti.