ShQO-da mototsıklshi elektr baǵanyna soǵylyp mert boldy
ÓSKEMEN. QazAqparat – Shyǵys Qazaqstan oblysy Shemonaıha aýdanynda elektr baǵanyna soǵylǵan mototsıkl júrgizýshi kóz jumdy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, oqıǵa 7 qyrkúıek kúni saǵat 15:35 shamasynda Shemonaıha aýdany Pervomaıskıı kentinde bolǵan.
«Polevaıa kóshesinde kele jatqan «Honda» markaly mototsıkldiń júrgizýshisi rýlge ıe bola almaı, elektr baǵanyna soǵyldy. Sonyń saldarynan 33 jastaǵy er adam sol jerde kóz jumdy. Qazirgi ýaqytta atalǵan fakti boıynsha QR QK-niń 345-baby 3-bóligine sáıkes (Kólik quraldaryn basqaratyn adamnyń abaısyzda adam ólimine ákep soqqan jol qozǵalysy erejelerin buzýy) sotqa deıingi tergeý amaldary bastaldy», - delingen aqparatta.
Birqatar sot-medıtsınalyq saraptama taǵaıyndalǵan. Sonyń nátıjeci boıynsha protsessýaldyq sheshim qabyldanady.
Eske salsaq, osyǵan deıin ShQO-da jeńil kólik pen KamAZ soqtyǵysyp, eki jolaýshy kóz jumǵanyn habarlaǵan edik.
Foto: www.instagram.com/eastkazpolice
