ShQO-da «Mereıli otbasy» baıqaýynyń jeńimpazdary marapattaldy
ÓSKEMEN. KAZINFORM – Shyǵys Qazaqstan oblysynda «Mereıli otbasy» ulttyq baıqaýynyń qorytyndysy shyǵaryldy. Bıylǵy jeńimpaz – Altaı aýdanynan kelgen Qydyrhanovtar otbasy.
Yntymaǵy jarasqan, ózgege úlgi bolarlyqtaı otbasylar anyqtalatyn «Mereıli otbasy» baıqaýynyń oblystyq kezeńine ár qala, aýdannan úzdik atanǵandar jınaldy. Bul baıqaýdyń maqsaty – otbasy qundylyqtaryn nasıhattaý, jastarǵa otbasy men nekeniń mańyzdylyǵyn kórsetý.
11 otbasynyń ishinen úshinshi oryndy Zaısan aýdanynan kelgen Boztaevtar otbasy ıelendi. Otaǵasy Baqytbek Qanapııauly mamyr aıynda sýǵa batyp bara jatqan 4 balany qutqaryp qalǵan. Jubaıy Sáýle Janseıitqyzymen birge mal ósirip, eti men sútin óndirip, aýdan halqyn tabıǵı taza ónimderimen qamtamasyz etýde. 5 balasy bilim, densaýlyq saqtaý, energetıka salalarynda jáne quqyq qorǵaý organdarynda adal qyzmet etip júr.
Al ekinshi orynǵa Ulan aýdanynan kelgen Najıtban otbasy jaıǵasty. Bul otbasynda 7 bala bar. Búrkit ósirip, oblystyq jáne respýblıkalyq jarystarda júldeli oryndardy ıelenip keledi. Sondaı-aq halyqaralyq «Búrkitshi» týrnırin uıymdastyryp, óńirdegi týrızmniń damýyna zor úles qosýda.
«Mereıli otbasy» ulttyq baıqaýynyń oblystyq kezeńiniń jeńimpazy bolyp Altaı aýdanynan kelgen Qydyrhanovtar otbasy tanyldy. Otbasynda 4 bala tárbıelenýde. Otaǵasy Aslan Bazarbekuly eńbek pániniń ustazy, qolóner sheberi. Jubaıy Ardaq Áýelbekqyzy matematıka pániniń muǵalimi. Ekeýi de óz mamandyqtary boıynsha respýblıkalyq baıqaýlardyń jeńimpazdary. Qyzdary Arna bıyl «Altyn belgi» ıegeri atanyp, S.Amanjolov atyndaǵy Shyǵys Qazaqstan ýnıversıtetine grantqa túsken.
- Búgin Óskemende «Mereıli otbasy» ulttyq baıqaýynyń marapattaý rásimi ótti. Buǵan deıin aýyl, aýdan, qalalyq kezeńderde baq synap, jeńimpaz atanǵan januıalardy da marapattadyq. Bıyl ShQO boıynsha ataýly baıqaýǵa ár aýyl-aımaqtan 136 ótinim kelip tústi. Oblystyq kezeńde jeńipmaz atanǵan otbasy Astana qalasynda ótetin baıqaýdyń respýblıkalyq kezeńinde óńir namysyn qorǵamaq, - dedi oblystyq Іshki saıasat basqarmasy basshysynyń orynbasary Almıra Tólegenqyzy.
