ShQO-da mereke kúnderi saıajaıǵa barýǵa ruqsat etildi
ÓSKEMEN. QazAqparat – Shyǵys Qazaqstan oblysynda 7-10 mamyr aralyǵynda jeke kólikpen saıajaıǵa barýǵa ruqsat etildi, dep habarlaıdy QazAqparat tilshisi.
Bul jaıly aımaq basshysy Danıal Ahmetov Instagram-daǵy paraqshasynda jazdy.
«Halyqtyń ótinishi boıynsha ShQO-nyń jedel shtaby mereke kúnderi, ıaǵnı 7-10 mamyr aralyǵynda saıajaı ýchaskelerine jeke avtokólikpen barýǵa ruqsat berý týraly sheshim qabyldady. Osylaısha turǵyndar ruqsat qaǵazynyń jup nemese taq kúnderine qaramastan, qalada nemese blokpostardan ary ornalasqan óz saıajaılaryna baryp demalyp, jumys isteı alady», - deıdi ákim.
Onyń aıtýynsha, eń bastysy ózimen birge baý-baqsha seriktestiginiń múshelik kitapshasy nemese saıajaı ýcheskesiniń ıesi ekendigin rastaıtyn kez kelgen basqa qujat bolýy tıis.
«Mamyr merekelerinde saıajaıda belsendi jumys bastalatynyn túsinemiz. Kóptegen adamdar tabıǵatta demalǵysy keledi. Bul bizdiń árqaısymyz úshin óte mańyzdy. Alaıda koronavırýstyń jańa jaǵdaılarynyń taralýyn jáne kóbeıýin boldyrmaý úshin saqtyq sharalaryn qatań ustap, kórshilerińizben qashyqtyq saqtaýdy umytpaý kerek», - dedi Danıal Ahmetov.
