ShQO-da memlekettiń 2 mlrd teńgeden astam qarjysyn jymqyrǵan 3 adam sottaldy

ÓSKEMEN. KAZINFORM – Shyǵys Qazaqstan oblysynda memleket bıýdjetine qomaqty zalal keltirgen aktsıonerlik qoǵamnyń basqarma tóraǵasy men 2 qyzmetkeri túrmege qamaldy.

Іs Óskemen qalalyq № 2 sotynda qaraldy. Belgili bolǵandaı, Rıdder qalasynyń eks ákimi Dáýlet Batyrbaev «Shyǵys Qazaqstan oblystyq memlekettik-jekemenshik áriptestik óńirlik ortalyǵy» AQ-nyń basqarma tóraǵasy laýazymyn atqarǵan kezde osy aktsıonerlik qoǵamnyń jumys tobynyń jetekshisi H.-nyń kómegimen tehnıkalyq sıpattamalarǵa saı kelmeıtin kóshe shamdaryn qabyldap alǵan. Osylaısha, olar memleketke 2 266 707 000 teńge kóleminde zalal keltirgen.

Sondaı-aq 2023 jylǵy 6 sáýir men 25 shilde aralyǵynda Dáýlet Batyrbaev, H. jáne jumys tobynyń taǵy bir qyzmetkeri P.-men jalǵan aralyq aktilerge qol qoıyp, 122 883 000 teńge jymqyrdy.

— Budan bólek, 2022 jylǵy 2 qyrkúıek pen 12 jeltoqsan aralyǵynda olar merdigermen zańsyz qosymsha kelisim jasasyp, jumystar men taýarlardyń qunyn negizsiz kóterip, 206 003 200 teńgeni artyq tólegen. Aıyptalýshylar óz kinálaryn moıyndamaǵanymen, sot olardyń kinási dáleldendi degen sheshimge keldi, — dep habarlady sottyń baspasóz qyzmetinen.

Sot úkimine sáıkes Dáýlet Batyrbaev pen H. 8 jylǵa, P. esimdi aıyptalýshy 7 jylǵa bas bostandyqtarynan aıyryldy. Úkim áli zańdy kúshine engen joq.

Eske salsaq, osyǵan deıin Sybaılas jemqorlyqqa qarsy is-qımyl ulttyq bıýrosynyń burynǵy basshysy Tatýbaev ustalǵany habarlanǵan.