ShQO-da memlekettik qyzmettiń bedelin túsirgen ákim jaýapqa tartyldy

ÓSKEMEN. KAZINFORM — Shyǵys Qazaqstan oblysy Samar aýdanyndaǵy memlekettik qyzmettiń bedelin túsirgen aýyldyq okrýg ákimi jaýapqa tartyldy.

Samar aýyldyq okrýginiń ákimi memlekettik satyp alý týraly zańnamany buzǵan. Ol basqa áleýetti jetkizýshilerdi tenderge qatysý múmkindiginen aıyryp, bir kózden bir JShS-men negizsiz eki shart jasasty.

— Kelisimsharttardyń jalpy somasy 20 mln teńgeden asty. Bul qarajatqa qatty turmystyq qaldyqtar polıgonyn qorshaý jáne aýdan ortalyǵyna beınebaqylaý júıesin ornatý jumystary satyp alynǵan. Alaıda sońǵy shart boıynsha naqty oryndalmaǵan jumystar úshin ishinara tólem jasalǵan. Memlekettik satyp alýdy uıymdastyrý jáne ótkizý tártibin buzǵany úshin aýdan prokýratýrasynyń qaýlysyna sáıkes, Samar aýyldyq okrýginiń ákimi ÁQBtK-niń 207-baby 11-bóligi boıynsha ákimshilik jaýapkershilikke tartyldy. Oǵan 200 AEK mólsherinde aıyppul salyndy, — dep habarlady prokýratýradan.

Sonymen qatar aýdan prokýratýrasy memlekettik qyzmet isteri jónindegi ýákiletti organnyń ádep keńesiniń qaraýyna aýyl ákimin tártiptik jaýapkershilikke tartý týraly usynys engizdi. 

— Sebebi ol óz zańsyz áreketterimen memlekettik qyzmettiń bedelin túsirgen. Ádep keńesiniń sheshimimen aýyl ákimine qyzmetine tolyq sáıkes emestigi týraly eskertildi, — delingen habarlamada.

Budan buryn Óskemende 20 jyl burynǵy qylmys ashylǵanyn jazdyq.