ShQO-da memlekettik mekeme esepshisi 2 mln teńge jymqyrǵan
Bul jaıly ShQO Sybaılas jemqorlyqqa qarsy qyzmetiniń basshysy Erlan Jalmaǵambet onlaın formatta ótken jıyn barysynda aıtty.
«Jarma aýdandyq sáýlet, qala qurylysy jáne qurylys bóliminiń esepshisi 2011-2019 jyldar aralyǵynda óziniń kartochkalyq shotyna 2 mln teńgeni aýdarý arqyly bıýdjet qarajatyn jymqyrǵan. Bul qylmystyń jasalýynyń negizgi sebepteriniń biri – tikeleı basshynyń aldyn alý sharalaryn qoldanbaýy jáne durys baqylaý jasamaýy», - dedi ol.
Onyń aıtýynsha, Jarma aýdanynyń ákimdigi men jergilikti memlekettik organdardyń basshylyǵy osyǵan uqsas quqyq buzýshylyqtardyń aldyn alý jáne boldyrmaý maqsatynda praktıkalyq is-sharalar ótkizip, qyzmetkerlerine sybaılas jemqorlyqqa qarsy zańnama erejelerin túsindirýi qajet.
Budan bólek, Jarma aýdandyq bilim bóliminiń jáne sáýlet, qala qurylysy jáne qurylys bóliminiń vedomstvolyq baǵynystaǵy uıymdarynyń býhgalterlik esep júrgizýine jyl saıynǵy tekserý kestesi bekitiledi.