ShQO-da memleketke qaıtarylǵan aktıvter esebinen MRT ortalyǵy ashyldy
ASTANA. KAZINFORM - Shyǵys Qazaqstan oblysynyń Altaı aýdanynda Magnıtti-rezonanstyq tomografııa (MRT) ortalyǵyn ornalastyrýǵa arnalǵan jańa ǵımarattyń ashylýy ótti.
Joba Memleket basshysynyń prokýratýra organdary memleketke qaıtarǵan zańsyz ıemdenilgen aktıvterdi áleýmettik mańyzy bar obektilerdi qarjylandyrýǵa baǵyttaý jónindegi tapsyrmasyn oryndaý aıasynda júzege asyryldy. Jobanyń jalpy quny - 622,6 mln teńge.
Osy ýaqytqa deıin Altaı aýdanynda jeke tomografııa kabıneti bolmaǵan. Tekserýden ótý úshin turǵyndarǵa 175 km qashyqtyqta ornalasqan oblys ortalyǵyna barýǵa týra keletin. Bul egde jastaǵy patsıentterge, múmkindigi shekteýli jandarǵa jáne shuǵyl dıagnostıkany qajet etetin azamattarǵa úlken qıyndyq týǵyzdy.
Oblystyq prokýratýra málimetinshe, jańa MRT ortalyǵynyń ashylýy aýdannyń jáne irgeles eldi mekenderdiń 50 myńnan astam turǵynyn sapaly ári der kezindegi dıagnostıkalyq kómekpen qamtamasyz etýge múmkindik berdi.
Osyndaı jobalardy júzege asyrý densaýlyq saqtaý júıesin damytýǵa, azamattardyń ómir súrý sapasyn arttyrýǵa yqpal etedi. Sondaı-aq memleketke qaıtarylǵan qarajattyń ashyq ári tıimdi paıdalanylýyn qamtamasyz etedi.
Jambyl oblysynda qaıtarylǵan aktıvter esebinen 84 myń turǵyndy gazben qamtıtyn joba aıaqtalatynyn jazǵan edik.
