ShQO-da memleketke 4 myń gektardan astam jer qaıtaryldy
ASTANA. KAZINFORM – Prokýrorlyq qadaǵalaý aktileri boıynsha kadastrlyq quny 20 mln teńgeden asatyn, jalpy aýdany 4 myń gektardan astam atalǵan jer memleket menshigine qaıtaryldy.
Shyǵys Qazaqstan oblysy Samar aýdanynyń prokýratýrasy paıdalanylmaı jatqan, sondaı-aq zańsyz berilgen jer ýchaskelerin anyqtaý jáne memleket menshigine qaıtarý boıynsha júıeli jumys istep jatyr.
— Zańdylyqtyń saqtalýyna júrgizilgen taldaý barysynda birqatar jer paıdalanýshynyń zańnama talaptaryn buza otyryp, jalpy sany 20 jer ýchaskesin uzaq ýaqyt boıy nysanaly taǵaıyndalýy boıynsha paıdalanbaǵany anyqtaldy.
Prokýrorlyq qadaǵalaý aktileri boıynsha kadastrlyq quny 20 mln teńgeden asatyn, jalpy aýdany 4 myń gektardan astam atalǵan jer memleket menshigine qaıtaryldy, — delingen habarlamada.
Sondaı-aq, aýdan prokýratýrasy mindetti saýda-sattyqty (aýktsıondy) ótkizbesten, kommertsııalyq jer ýchaskesin zańsyz berý faktisin anyqtady.
— Atap aıtqanda, Samar aýyldyq okrýgi ákiminiń ókimimen jeke tulǵaǵa Samar aýylyndaǵy jol boıyndaǵy servıs obektilerine (dúken, dámhana, qonaq úı kesheni, elektromobılderge arnalǵan JQS) arnalǵan aýdany 0,50 ga ýchaske 3 jylǵa ýaqytsha paıdalanýǵa berilgen.
Aýdan prokýratýrasy ákimdiktiń mekenjaıyna zań buzýdy joıý týraly usyný engizdi. Nátıjesinde, jergilikti atqarýshy organnyń talap aryzy boıynsha Samar aýdandyq sotynyń zańdy kúshine engen sheshimimen naryqtyq quny 2 mln teńgeden asatyn osy kommertsııalyq ýchaske memleketke tolyǵymen qaıtaryldy, — delingen habarlamada.
Aıta ketelik Túrkistan oblysynda jyl basynan beri memleketke qansha jer qaıtarylǵan edi.
