Óskemen áýejaıy basshylyǵy memleketke 157 mln teńge shyǵyn keltirgen
ASTANA. KAZINFORM – Qarjylyq monıtorıng agenttiginiń Shyǵys Qazaqstan oblysy boıynsha departamenti Bas kólik prokýratýrasynyń úılestirýimen «Óskemen áýejaıy» AQ basshylyǵyna qatysty qyzmettik ókilettikterin asyra paıdalaný, asa iri kólemde senip tapsyrylǵan múlikti ıemdený jáne qylmystyq jolmen alynǵan qarajatty zańdastyrý faktileri boıynsha tergeýdi aıaqtady.
Bes jyl boıy aktsıonerlik qoǵamnyń burynǵy prezıdenti men ózge de laýazymdy tulǵalary eńbekaqyny negizsiz kóbeıtý, jalǵan syıaqylar men jalǵan sharttar jasaý arqyly júıeli túrde aqsha jymqyrǵan.
Jymqyrylǵan qarajat keıin kassa arqyly qolma-qol aqshaǵa aınaldyrylǵan. Qoǵamǵa tıesili kólik quraldary býhgalterlik esepten shyǵarylyp, naryqtaǵy qunynan birneshe ese tómen baǵamen senimdi tulǵalarǵa satylǵan.
Sonymen qatar, qoǵamnyń kommertsııalyq nysandary jeńildetilgen sharttarmen jalǵa berilgeni anyqtaldy: ıaǵnı, jaldaý aqysy tómendetilip, naqty jalǵa berilgen aýmaq azaıtylyp kórsetilgen. Memleketke keltirilgen jalpy zalal - 157 mln teńge.
Sot sanktsııasymen kúdiktilerdiń 126 mln teńge kólemindegi múlkine (4 páter, jer ýchaskesi jáne 2 avtokólik) tyıym salyndy. Kúdiktiler qamaýǵa alyndy. QR QPK-niń 201-babyna sáıkes ózge aqparat jarııa etilmeıdi.
Qarjylyq monıtorıng agenttigi jyl basynan beri 36 qarjy pıramıdasynyń qyzmetin toqtatqany týraly jazdyq.