ShQO-da mektepke «bomba qoıǵan» áıel 3 jylǵa sottaldy

ÓSKEMEN. KAZINFORM — Shyǵys Qazaqstan oblysynda mektepke bomba qoıylǵany jaıly jalǵan habar bergen áıel 3 jylǵa bas bostandyǵynan shekteldi.

Oqıǵa Altaı qalasynda bolǵan. «101» jedel arnasyna qońyraý shalǵan áıel mektepterdiń birine jarylǵysh zat qoıylǵany týraly aıtqan. Sol jerge jedel qyzmetter kelip jetip, tolyqqandy tekserý júrgizdi. Alaıda bul habar jalǵan bolyp shyqty.

Osylaısha, jalǵan habar taratýǵa qatysty qylmystyq is qozǵalyp, kúdiktiniń kim ekendigi anyqtaldy. Tergeý amaldary aıaqtalǵan soń is sotqa jetti.

— Sot barysynda áıel adam óz kinásin tolyqtaı moıyndap, istegen isine qatty ókinetindigin jetkizdi. Ol jalǵan habar bergen kezde mas kúıde bolǵan. Bul jazany aýyrlatatyn mán-jaı retinde sanalady. Sot sheshimimen aıyptalýshy 3 jyl merzimge bas bostandyǵynan shekteldi, — delingen aqparatta.

Úkim áli zańdy kúshine engen joq.

Eske salsaq, osyǵan deıin Óskemende bir aı buryn joǵalyp ketken qyzdyń denesi tabylǵany habarlanǵan.