ShQO-da mektep túlekteriniń shetelge ketýi 5 esege azaıdy

ÓSKEMEN. QazAqparat – Shyǵys Qazaqstan oblysynda mektep túlekteriniń sheteldik ýnıversıtetterge ketýi 5 esege azaıdy, dep habarlaıdy QazAqparat tilshisi.

Aımaq basshysy Danıal Ahmetov bilim salasyna qatysty jınalys ótkizdi. Onda sońǵy jyldary júzege asyrylyp kele jatqan «Bilikti maman» jobasy talqylandy.

«Qosymsha fakýltetterdiń ashylýy, JOO men kolledjderdiń tehnıkalyq jabdyqtalýy, quzyrettilik ortalyqtarynyń ashylýy mektep túlekteriniń kórshi memleketterge ketýin bes ese azaıtýǵa múmkindik berdi. 2017 jyly oqýǵa túsken stýdentter byltyr oqýlaryn támamdady. Búginde olardyń barlyǵy tańdaǵan mamandyqtary boıynsha jumysqa ornalasqan», - dedi oblys ákimi.

Onyń aıtýynsha, «JOO-stýdent-jumys berýshi» úshjaqty kelisim aıasynda jastar óńirdiń iri kompanııalarynda jumys isteýde. Sondaı-aq aýyldarǵa eńbek etýge ketkenderi de az emes.

«Qazirgi tańda oblysta zootehnıkterdiń, veterınarlardyń, dárigerlerdiń jetispeýshiligi baıqalady. Osy máseleni eskere otyryp, atalǵan mamandyqtar boıynsha granttar sanyn kóbeıtý týraly sheshim qabyldadyq. Nátıjesinde maman tapshylyǵy azaıyp, túlekter birden jumysqa ornalasady. Budan bólek, áleýmettik jeńildikter de qarastyrylady», - dedi Danıal Ahmetov.