ShQO-da mektep túlekterine qashyqtan baǵyt-baǵdar berilýde

ÓSKEMEN. QazAqparat – ShQO Jastar resýrstyq ortalyǵy mektep túlekterine arnap «Kásiptik bilim berýdiń onlaın ashyq esik kúni» sharasyn ótkizdi, dep habarlaıdy QazAqparat tilshisi.

Qashyqtan baǵyt-baǵdar berý jumystary S.Amanjolov atyndaǵy ShQMÝ-da, D.Serikbaev atyndaǵy ShQMTÝ-da, Qazaqstan-Amerıkalyq erkin ýnıversıteti men Qazaq ınnovatsııalyq gýmanıtarlyq-zań ýnıversıtetinde ótkizilgen. Oǵan 5000-ǵa jýyq túlek qatysty. Budan bólek, 3000-ǵa tarta joǵarǵy oqý oryndary stýdentteriniń qatysýymen Kýrchatov qalasynda, Altaı, Abaı, Aıagóz, Besqaraǵaı, Glýbokoe, jáne Boradýlıha aýdandarynda onlaın formattaǵy «Qalalar men aýdandar kúni» ótti. Aldaǵy ýaqytta mundaı baǵyttaǵy jumystar oblystaǵy basqa da aýdandar men qalalarda uıymdastyrylmaq.

«Osy kúnge deıin qashyqtan baılanys ornatylyp, 9 myńnan astam talapkerge baǵyt-baǵdar jasaldy. Jastar tarapynan qoıylǵan suraqtarǵa tıisti jaýap berildi. Shyǵys Qazaqstan oblysynyń ákimi Danıal Ahmetovtiń bastamasymen «Bilikti maman» jobasy júzege asyrylýda. Atalmysh joba aıasynda talapkerler úshin respýblıkalyqtan bólek qosymsha granttar bólinedi», - dedi ShQO Jastar resýrstyq ortalyǵynyń dırektory Araılym Esimbekova.

Aıta keteıik, «Bilikti maman» jobasy qolǵa alynǵaly beri aımaq boıynsha 1 046 stýdentke grant berilgen.