ShQO-da mektep ashanasyndaǵy sorpa ishinde qurt júrgen
ÓSKEMEN. KAZINFORM – Shyǵys Qazaqstan oblysy Úlken Naryn aýdanynyń ortalyǵyndaǵy Lenın atyndaǵy orta mekteptiń oqýshylary mektep ashanasyndaǵy sorpa ishinen qurt taýyp alǵan.
Bul týraly mekteptegi ata-analar komıtetiniń tóraǵasy Oksana Zanına málim etti.
- Balalar ashanadaǵy sorpa ishinde júrgen tiri qurtty kórgen. Bul birinshi jaǵdaı emes. Buǵan buryn foto dálel bolmaǵan soń, eshteńe isteı almadyq. Al búgin balalar sýretke túsirip, ata-analaryna jiberdi, - deıdi ol.
Oksana Zanınanyń aıtýynsha, oqý jyly bastalǵaly beri mektep ashanasyn jalǵa alýshy kásipkerge qatysty shaǵym jıi túsip keledi. Alaıda mektep ákimshiligi bul máselede áreketsizdik tanytyp otyr.
Aýdandyq bilim bólimi sanıtarlyq-epıdemıologııalyq qyzmetke jospardan tys tekseris júrgizý týraly resmı hat joldaǵanyn habarlady.
- Qazirgi ýaqytta tekseris júrgizý máselesi qaralý kezeńinde tur. Sonyń qorytyndysy boıynsha zańnamaǵa sáıkes barlyq qajetti sharalar qabyldanady, - delingen aqparatta.
Sondaı-aq mektep ákimshiligine qatysty qyzmettik tekseris bastaldy. Bilim ordasynyń basshylyǵyna tıisti tártiptik sharalar qoldanylýy múmkin.
Eske salsaq, osyǵan deıin ShQO-da jasóspirimder arasyndaǵy qylmys 45 paıyzǵa óskeni habarlanǵan.