ShQO-da medıtsınalyq mekeme zańsyz tekserý júrgizbek bolǵan departamentti sotta jeńip shyqty

ÓSKEMEN. QazAqparat – Shyǵys Qazaqstan oblysynda medıtsınalyq mekeme zańsyz tekserý júrgizbek bolǵan Medıtsınalyq jáne farmatsevtıkalyq baqylaý komıtetiniń ShQO boıynsha departamentin sotta jeńip shyqty, dep habarlaıdy QazAqparat tilshisi.

Oblystyq sottyń baspasóz qyzmeti taratqan aqparatqa súıensek, «Reprodýktıvti medıtsına ortalyǵy» JShS Medıtsınalyq jáne farmatsevtıkalyq baqylaý komıtetiniń ShQO boıynsha departamentiniń tekserýin jaramsyz dep taný jáne tekserýdi taǵaıyndaý týraly aktiniń kúshin joıý týraly aryzben sotqa júgindi.

Belgili bolǵandaı, atalǵan departamentke medıtsınalyq mekeme patsıentteriniń biri shaǵym túsirgen. Ol ekstrakorporaldy uryqtandyrý jasatqan, biraq bala kótermegen. Osy shaǵymnan soń departament tekserý júrgizbek boldy.

«QR Prezıdentiniń 2019 jylǵy 26 jeltoqsandaǵy № 299 «Qazaqstan Respýblıkasynda tekserýlerge jáne barlaýmen profılaktıkalyq baqylaý men qadaǵalaýǵa moratorıı engizý týraly» Jarlyǵyna sáıkes, departamenttiń tekserý taǵaıyndaýǵa quqyǵy joq. Sebebi patsıent shaǵymy medıtsınalyq qyzmet kórsetý sapasyna qatysty bolǵanmen, halyqtyń ómiri men densaýlyǵyna jappaı qaýip tóndiretin buzýshylyqtar týraly emes. Talapker kommertsııalyq negizde medıtsınalyq qyzmet kórsetedi, álemdik tájirıbe boıynsha EKU protsedýrasy 30-40% jaǵdaıda ǵana oń nátıje beredi», - delingen aqparatta.

Sot Medıtsınalyq jáne farmatsevtıkalyq baqylaý komıtetiniń ShQO boıynsha departamentiniń medıtsınalyq mekemege tekserýin jaramsyz dep taný jáne tekserýdi taǵaıyndaý týraly aktiniń kúshin joıý týraly sheshim shyǵardy.