ShQO-da medıtsınalyq kómek kórsetý sapasynyń «Altyn standarty» ázirlenýde
ÓSKEMEN. QazAqparat - 2021 jylǵa deıin úsh emdeý mekemesinde JCI medıtsınalyq kómek kórsetý sapasynyń halyqaralyq "altyn standartyna" kóshý josparlanýda, dep habarlaıdy «QazAqparat» HAA.
ShQO ákimi Danıal Ahmetov oblystyń qoǵamdyq jıynynda elimizde nebary 7 medıtsınalyq mekeme halyqaralyq standart boıynsha akkredıttelgenin aıtyp ótti.
«Semeı qalasyndaǵy jedel medıtsınalyq kómek aýrýhanasy bir jyl ishinde atalǵan standartqa kóshýi tıis. 2021 jylǵa deıin taǵy eki uıym - Oblystyq mamandandyrylǵan medıtsınalyq ortalyq jáne Óskemen qalasyndaǵy ana men bala ortalyǵy halyqaralyq standartqa saı qyzmet kórsetýge kóshýi kerek. Bul úshin bizdegi múmkindik jetkilikti. Biz elimizde eń kóp dárigerlerdi Eýropada oqytyp jatyrmyz, jańa qurylǵylar alynatyn bolady», - dedi aımaq basshysy.
Bul medıtsınalyq týrızmdi damytý jolyndaǵy negizgi baǵyttardyń biri bolyp tabylady. Shyǵys qazaqstandyq medıtsınanyń negizgi artyqshylyǵy robottandyrylǵan hırýrgııasy, kardıohırýrgııa, travmatologııa, onkologııa, ońaltý salasynda bolady.
