ShQO-da medıtsınalyq ımplanttar jasaýǵa baǵyttalǵan joba nátıjeli iske asýda
ÓSKEMEN. QazAqparat – D. Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń ǵalymdary adam aǵzasyna arnalǵan medıtsınalyq ımplanttar jasaýda. Joǵary tehnologııalyq joba óńir basshysy qoldaýymen iske asyrylýda. Bul jaıly QazAqparat tilshisine ShQMTÝ prototıpteý ortalyǵynyń basshysy, ǵalym Baǵdat Azamatov aıtyp berdi.
«Bul joba 2017 jyly qolǵa alynǵan. Ýnıversıtetimiz Óskemendegi Úlbi metallýrgııa zaýytymen jáne elordadaǵy Travmatologııa jáne ortopedııa ǵylymı zertteý ýnıversıtetimen birlesip osy baǵytta eńbek etti. Nátıjesinde otandyq ımplanttar jasaý isi jolǵa qoıylǵan. Bizdiń travmatologııa-ortopedııa salasynda qoldanylatyn ımplanttar sheteldikine qaraǵanda birshama jetilgen. Sebebi otandyq ımplanttarda metall quımalarynyń sapasy joǵary», – deıdi Baǵdat Azamatov.
Onyń aıtýynsha, qazaqstandyq ımplanttar medıtsınada qoldanyla da bastaǵan. Alǵash ret ımplanttar Nur-Sultan qalasynyń eki turǵynyna salyndy. Qazir olardyń jaǵdaılary jaqsy. Joba testileý merziminen ótý úshin 30 ota jasalýy qajet.
«Medıtsınalyq ımplanttar jasaý jobasynyń kommertsııalyq áleýeti joǵary. Óıtkeni negizinen osyndaı otalar kóp jasalady. Osy oraıda oblys ákimi Danıal Ahmetovtiń bizge kórsetken qoldaýyn erekshe atap ótken jón. Búginde zertteý ınstıtýtynyń tapsyrysy boıynsha 8 túrli ımplant jasaldy. Sapaly otandyq ımplanttardy jasaýǵa qajetti barlyq múmkindikter bar. Alda joǵary jetistikterge qol jetkizemiz dep senemiz», - deıdi Baǵdat Azamatov.
Aldaǵy 3 jylda jobany iske asyrýǵa 5 mlrd teńgeden astam qarajat bólingen. Osy somanyń 1,8 mlrdy ǵalymdar men ınjenerlerge ǵylymı-zertteý jumystaryn júrgizýge jáne qajetti qural-jabdyqtardy satyp alýǵa jumsalmaq.
