ShQO-da medıtsına sapasyna qatysty 400-den astam shaǵym tústi

ÓSKEMEN. QazAqparat – Bıylǵy jyldyń birinshi toqsanynda óńir turǵyndary «Áleýmettik medıtsınalyq saqtandyrý qory» ShQO fılıalyna 35 myńnan astam ótinish jasaǵan, onyń 400-den astamy medıtsınalyq kómektiń sapasy men qoljetimdiligine baılanysty shaǵym, dep habarlaıdy QazAqparat tilshisi.

Taldaý kórsetkendeı, azamattar kóbinese 1406 baılanys ortalyǵyna habarlasady. Atap aıtqanda, qysqa nómir arqyly ótinishterdiń 83%-y jasalǵan. Ekinshi orynda – Qoldau 24/7 mobıldi qosymshasy. Bul arna arqyly turǵyndar negizinen qandaı da bir qyzmet týraly aqyl-keńes suraıdy. Jarnalar men aýdarymdardy qalaı tóleý kerektigi, MÁMS boıynsha medıtsınalyq kómekti alý úshin qandaı kezeńderde tólem júrgizý qajettigi sııaqty saýaldar qoıylǵan.

«Shaǵymdarǵa qatysty aıtar bolsaq, azamattardy medıtsınalyq kómektiń sapasyz kórsetilýi nemese odan bas tartylýy, konsýltatsııalyq-dıagnostıkalyq qyzmetterdi tym uzaq kútýi, belgili bir mamandarǵa jazylýdyń múmkin emestigi mazalaǵan. Qor mamandary árbir shaǵym boıynsha egjeı-tegjeıli taldaý júrgizip jatyr. Biz patsıentterdi óz quqyqtaryn bilýge jáne quqyqtary buzylǵan jaǵdaıda, eń aldymen medıtsınalyq uıymnyń ózindegi patsıentterge qoldaý kórsetý qyzmetine júginýge shaqyramyz. Bul qyzmetter barlyq emhanalar men aýrýhanalarda bar. Eger máseleni sol jerde sheshý múmkin bolmasa, qorǵa júginý qajet», - delingen qordyń baspasóz qyzmeti taratqan aqparatta.

Esterińizge sala ketsek, osyǵan deıin ShQO-da jyljymaly medıtsınalyq keshenderdiń eldi mekenderdi aralaıtyndyǵyn habarlaǵan edik.