ShQO-da medıtsına nysandaryn salýǵa 80 mln teńge bólindi
ShQO Qurylys, sáýlet jáne qala qurylysy basqarmasynyń málimetine súıensek, bıyl óńir boıynsha 10 medıtsına nysanynyń qurylysy júrgiziledi.
«Búgingi tańda tórt nysannyń jobalyq-smetalyq qujattamasy ázirlengen. Al altaýynda qurylys-montajdaý jumystary júrgizilýde. Atap aıtqanda, Rıdder qalasynda kópsalaly aýrýhana kesheni, Semeıde múmkindigi shekteýli jandardy ońaltý ortalyǵy, Óskemende gematologııalyq ortalyq, Kúrshim aýdany Qaljyr aýylynda jáne Úrjar aýdany Qaratuma aýylynda dárigerlik ambýlatorııa salynyp jatyr. Sondaı-aq Shyǵys Qazaqstan oblystyq mamandandyrylǵan medıtsınalyq ortalyǵynyń ǵımaraty jańǵyrtylýda», - deıdi basqarma bastyǵynyń orynbasary Álisher Beken.
Onyń aıtýynsha, Úrjar, Ulan jáne Glýbokoe aýdandarynda salynatyn emhana men dárigerlik ambýlatorııanyń jobasy daıyndaldy. Jalpy osy jyly oblysta medıtsına nysandaryn salýǵa 80 mln teńge bólingen.
Esterińizge sala ketsek, osyǵan deıin Óskemende halyqaralyq standartqa saı keletin tennıs ortalyǵy ashylǵanyn habarlaǵan edik.