ShQO-da medıtsına mamandaryna páter kiltteri tabys etildi
ÓSKEMEN. QazAqparat - Shyǵys Qazaqstan oblysynyń ákimi medıtsına salasynyń jas mamandaryna páterlerdiń kiltterin tabys etti. Óskemende 40-qa jýyq medıtsına mamandarynyń otbasy, 32 kezekte turǵan qyzmetkerler baspanaly boldy, dep habarlaıdy «QazAqparat» oblys ákimdiginiń baspasóz qyzmetine silteme jasap.
Óńir basshysy Danıal Ahmetov medıtsına qyzmetkelerin merekelerimen quttyqtady. «Sizderdiń atqaryp jatqan jumystaryńyz úshin úlken alǵysymdy bildiremin»,-dedi oblys ákimi.
«Sizder bizdiń ómirimizdegi eń basty qundylyq-densaýlyqty qorǵaısyzdar. Sizder kún saıyn adamdardyń jandarynyń qınalǵandyǵyn kóre otyryp, sondaı jaǵdaılardyń múmkindiginshe az bolýyna úles qosyp kelesizder. Biz medıtsınamyzdyń myqty ári tıimdi bolýy úshin barlyǵyn jasaımyz».
70 páterlik jataqhana 29 jasqa deıingi jastarǵa arnalyp salynǵan. Ol 5 jylǵa jekeshelendirý quqynsyz beriledi. Jalǵa alý quny sharshy metrine 65 teńge. Óskemenge osy ýaqytta 60-qa jýyq medıtsına mamandary jetispeıdi. Bıylǵy jyly dárigerler men jas mamandarǵa taǵy 90 páter bólinedi. Bul óz kezeginde oblys ortalyǵynda ondaǵan jyldardan beri qalyptasqan densaýlyq saqtaý salasyndaǵy mamanǵa degen zárýlik problemasyn joıýǵa yqpal etpek.
