ShQO-da medıtsına qyzmetiniń sapasyna qatysty 900-ge jýyq shaǵym tústi

ÓSKEMEN. QazAqparat – Shyǵys Qazaqstan oblysynda jyl basynan beri medıtsınalyq qyzmet sapasyna qatysty 900-ge jýyq shaǵym tústi, dep habarlaıdy QazAqparat tilshisi.

Oblystaǵy medıtsınalyq mekemelerde naýqastarǵa bıyl 32 998 ota jasalǵan. Onyń ishinde joǵary tehnologııalyq ota sany – 184. Bul jaıly ShQO Áleýmettik medıtsınalyq saqtandyrý qorynyń basshysy Ǵalymjan Ábilov málim etti.

«Shyǵys Qazaqstan halqyna medıtsınalyq kómek kórsetýge 2022 jyly 71,3 mlrd teńge bólingen. Osy jyldyń alty aıynda 500 myńnan astam zerthanalyq zertteý, 255 myń aspaptyq dıagnostıka júrgizildi. Arnaıy monıtorıng nátıjeleri boıynsha medıtsınalyq mekemelerde 27 myń buzýshylyq anyqtaldy. Salynǵan aıyppuldyń jalpy somasy – 486 mln teńgeni qurap otyr», - dedi ol.

Patsıentterdi dári-dármekpen qamtamasyz etýge erekshe nazar aýdarylýda. 2022 jyly ambýlatorııalyq dárimen qamtýǵa 5,9 mlrd teńge bólingen.

«Qor jumysynyń basty baǵyttarynyń biri – halyqpen keri baılanys ornatý jáne patsıentterdiń quqyǵyn qorǵaý. Jyl basynan beri bizge turǵyndardan 22 949 ótinish kelip tústi. Onyń ishinde 889-y – aryz shaǵym. Ár shaǵym boıynsha tekserý júrgizilip, tıisti shara qabyldandy», - dedi Ǵalymjan Ábilov.

Eske salsaq, osyǵan deıin ShQO-da tegin dári-dármekpen qamtylǵan naýqas sany 1,5 ese artqanyn habarlaǵan edik.