ShQO-da maıly daqyldardyń egistik alqaby 30 myń gektarǵa ulǵaıady
ÓSKEMEN. QazAqparat – Shyǵys Qazaqstan oblysynda maıly daqyldardyń egistik alqaby 30 myń gektarǵa ulǵaıady, dep habarlaıdy QazAqparat tilshisi.
Bul jaıly oblys ákimdiginde ótken jıyn barysynda aıtyldy. Jalpy, oblys boıynsha ótken jyly azyq-túlik óndirisiniń kólemi 148,8 mlrd teńgeni quraǵan.
«Aýyl sharýashylyǵy salasynyń óńdelgen ónimderiniń negizgi úlesin maıly daqyldar, et, sút, astyq jáne nan-toqash alady. Bıyl oblystaǵy maıly daqyldardyń egistik alqaby 30 myń gektarǵa ulǵaıtylmaq. Jyl sońyna deıin Semeıde maıly daqyldardy óńdeý kásiporny iske qosylady. 2022 jyly taǵy bir maı zaýyty óz jumysyn bastaıdy dep josparlanyp otyr», - dedi ShQO ákimi Danıal Ahmetov.
Ótken jyly oblystyń 21 kásiporny 16,8 myń tonna et óndirgen. Qazirgi ýaqytta taǵy 3 joba iske asýda. 2024 jylǵa qaraı óńirde óńdelgen et ónimderiniń úlesin 94 myń tonnaǵa deıin arttyrý kózdelgen.
«Oblys boıynsha sút ónimderin qaıta óńdeý salasynda 25 kásiporyn jumys isteıdi. Ónim kólemin ulǵaıtý jáne assortımentti keńeıtý maqsatynda «Emıl« JShS sút zaýyty qýattylyǵy jylyna 90 myń tonna bolatyn sút óńdeý boıynsha óndiristik-logıstıkalyq keshen salý jobasyn iske asyrýda», - dedi aımaq basshysy.
