ShQO-da maıly jáne jarmalyq daqyldar tuqymyn óńdeý zaýyty iske qosylady

ÓSKEMEN. KAZINFORM — Bıyl Shyǵys Qazaqstan aýyl sharýashylyǵy tájirıbe stantsııasynyń bazasynda maıly jáne jarmalyq daqyldar tuqymyn óńdeıtin zamanaýı zaýyttyń qurylysy bastalady. 

Ol memlekettik ınvestıtsııalyq joba aıasynda júzege asyrylady, basty maqsat-otandyq tuqym sharýashylyǵyn damytýǵa jáne agrarlyq sektordyń ımporttyq tuqymǵa táýeldiligin azaıtý.

Joǵary tehnologııalyq jańa keshen aýyl sharýashylyǵy taýar óndirýshilerin Soltústik pen Shyǵys Qazaqstannyń klımattyq jaǵdaılaryna beıimdelgen, sapaly ári básekege qabiletti soıa tuqymymen jáne kúnbaǵystyń býdandarymen qamtamasyz etýge múmkindik beredi.

Tájirıbe stantsııasy joǵary ónimdi, erte jáne tez pisetin soıa sorttary men kúnbaǵys býdandaryn shyǵarý baǵytynda júıeli túrde selektsııalyq-tuqym sharýashylyǵy jumystaryn júrgizip keledi.

Kásiporyn elıtalyq tuqym sharýashylyǵy mártebesine ıe jáne kúnbaǵys, soıa, jazdyq jáne kúzdik bıdaı, sondaı-aq mal azyqtyq daqyldar sorttary men býdandaryn shyǵarýshy sanalady.

Joba aıasynda tuqymdyq materıaldardy 95–99%-ǵa deıin tazartý deńgeıin qamtamasyz etetin zamanaýı joǵary tehnologııalyq jabdyqtarmen tolyq qamtylǵan tsıfrlyq keshen qurý qarastyrylǵan. Óńdeý úrdisinde tuqymdardy bólý, tazalaý, óńdeý, dárileý jáne qaptaý kezeńderinen ótedi. Tutynýshylarǵa otandyq jáne halyqaralyq sapa talaptaryna saı, egiske daıyn sertıfıkattalǵan tuqym materıaly usynylady.

Zaýyttyń jarmalyq taýarly daqyldar boıynsha óndiristik qýattylyǵy — saǵatyna 40 tonna, al kúnbaǵys boıynsha — saǵatyna 20 tonna bolsa, tuqymdyq rejımde ónimdilik jarmalyq daqyldar boıynsha saǵatyna 20 tonnaǵa, kúnbaǵys boıynsha saǵatyna 5 tonnaǵa deıin jetedi.

Aıta ketelik Qazaqstan men Estonııa agroónerkásip salasyndaǵy yntymaqtastyqty keńeıtedi.