ShQO-da maıdangerlerge ornatylǵan eskertkishterdiń jaı-kúıi qandaı
ÓSKEMEN. KAZINFORM — Ekinshi dúnıejúzi soǵysynda fashıstermen aıanbaı shaıqasqan maıdangerlerimizdiń atyn óshirmeı, urpaq jadynda máńgi saqtaý úshin olarǵa eskertkishter qoıylyp, esimi kósheler men túrli nysandarǵa berilip jatady. Kazinform Shyǵys Qazaqstan oblysynda qansha batyrdyń osylaı ulyqtalǵanyn anyqtap kórdi.
23 eskertkish bar
Sum soǵysta Otan úshin ot keshken jaýyngerlerdi óskeleń urpaqtyń jadynan óshirmeı, batyrlyqtyń sımvoly retinde nasıhattaý úshin Shyǵys Qazaqstanda olardyń eskertkishteri tuǵyrǵa qondyrylyp, kent, aýyl, kóshe men mektepke esimderi berilip kele jatyr.
ShQO mádenıet basqarmasynyń málimetine súıensek, óńir boıynsha UOS batyrlary men qatysýshylaryna arnalǵan 23 eskertkish bar.
— Onyń ishinde bireýi — respýblıkalyq mańyzy bar eskertkish, 22-si — jergilikti tarıh jáne mádenıet eskertkishi. Qala, aýdanǵa bólip aıtar bolsaq, Altaı aýdanynda — 1, Glýbokoe aýdanynda — 1, Úlken Naryn aýdanynda — 2, Kúrshim aýdanynda — 2, Tarbaǵataı aýdanynda — 1, Ulan aýdanynda — 2, Shemonaıha aýdanynda — 5, Rıdder qalasynda — 3, Óskemen qalasynda — 6 eskertkish bar. Osy jyly maıdangerlerge eskertkish ornatý josparda joq, — deıdi agenttiktiń resmı saýalhatyna jaýap joldaǵan basqarma basshysy Samat Qasenov.
Oblysta Jeńistiń 80 jyldyǵyna oraı jalpy sany 97 is-shara uıymdastyrylmaq. Onyń ishindegi 27-si — aýqymdy sharalar.
Shyǵys Qazaqstan boıynsha kóshe men nysandarǵa esimi berilgen KSRO batyrlary men UOS ardagerleriniń tizimi:
Altaı aýdanynda:
— 3 mektep,
— 38 kóshe,
Samar aýdanynda:
— 6 kóshe
Glýbokoe aýdanynda:
— 2 mektep
— 8 kóshe
Katonqaraǵaı aýdanynda:
— 1 mektep
— 6 kóshe
Kúrshim aýdanynda:
— 17 kóshe
Marqakól aýdanynda:
— 1 mektep,
— 4 kóshe
Tarbaǵataı aýdanynda:
— 4 mektep
— 11 kóshe
Ulan aýdanynda:
— 1 kent,
— 1 aýyldyq okrýg
— 4 mektep
— 2 balabaqsha-mektep kesheni
— 39 kóshe
Úlken Naryn aýdanynda:
— 10 kóshe
Shemonaıha aýdanynda:
— 1 mektep,
— 1 balabaqsha-mektep kesheni
— 19 kóshe
Zaısan aýdanynda:
— 2 mektep,
— 25 kóshe
Óskemen qalasynda:
— 1 mektep,
— 60 kóshe
Rıdder qalasynda:
— 1 kóshe.
Birnesheýine barǵanymyzda…
Endi osy eskertkishterdiń qandaı jaǵdaıda ekenin kórý úshin birnesheýine baryp kórdik. Eń áýeli Óskemendegi Qasym Qaısenov saıabaǵyna taban tiredik. Jasyl jelekke malynyp turǵan baqtyń kelbeti ádemi, ásem. Іshte partızan jazýshynyń eskertkishi de bar. Onyń da jaǵdaıy jaqsy, aınalasy taza. Biraq eskertkish baqtyń ortasynda emes, shet jaǵynda tur.
Ekinshi qaladaǵy Saǵadat Nurmaǵambetov atyndaǵy saıabaqqa keldik. Bul baq 2022 jyly Jibek matalar kombınaty yqshamaýdanynda ashylǵan.
Ortasynda batyrdyń músini ornalasqan. Bıiktigi — 3,6 metr, tuǵyry — 4,8 metr. Saıabaqtyń jalpy aýdany - 1,5 gektar. Onda tórt sýburqaq, jeti músindik ınstallıatsııa bar.
Eskertkishtiń búgingi jaǵdaıy jaqsy, degenmen saıabaq qoqysqa toly. Baqta serýendep, demalǵysy kelgen jurtty shashylǵan qaldyqtar men jaǵymsyz ıis qarsy alatyny qynjyltty.
Úshinshi Kúlenov kentindegi Іzǵutty Aıtyqov esimi berilgen kóshege baǵyt aldyq. Munda jol boıyna ornatylǵan keýdemúsin jaýyngerliń eren erligin eske salyp tur.
Jalpy jaǵdaıy jaman emes. Alaıda bıýsttiń bir taqtaıshasy túsip qalypty. Jeńis kúnine deıin búlingen bóligi qalpyna keltiriledi degen úmittemiz.
Tólegen Toqtarovqa arnalǵan eskertkish — Rıdder qalasyndaǵy Áýezov kóshesinde ornalasqan. 1970 jyly ornatylǵan 3,5 metrlik keýdemúsin búginde qanaǵattanarlyq jaǵdaıda. Degenmen, syrtqy boıaýy túsip bara jatqanyn baıqaýǵa bolady.
Eske salsaq, osyǵan deıin Astanaǵa áskerı bortpen qazaqstandyq UOS jaýyngerleriniń súıegi jetkizilgeni habarlanǵan.