ShQO-da maýsym aıynda aptap ystyq bolyp, keıde nóser jańbyr jaýady
ÓSKEMEN. KAZINFORM — Shyǵys Qazaqstan oblysynda jazdyń alǵashqy aıy qubylmaly bolǵaly tur. Keı kúnderi aýa temperatýrasy 40 gradýsqa deıin ysyp ketse, endi birde nóser jańbyr jaýyp, naızaǵaı soǵyp, kún salqyndaıdy.
«Qazgıdromet» RMK oblystyq fılıalynyń málimetine sáıkes, maýsym aıynda óńirdegi aýa temperatýrasy klımattyq normadan joǵary bolady. Ortasha aılyq temperatýra kópjyldyq kórsetkishten 1-2 gradýsqa artýy yqtımal.
Aıdyń eń ystyq kezeńi alǵashqy onkúndikke sáıkes kelmek. Osy ýaqytta keı jerlerde aýa temperatýrasy +33…+39 gradýsqa deıin kóteriledi. Alaıda mamandar aptap ystyq uzaqqa sozylmaıdy dep boljap otyr.
— Aı boıy óńir aýmaǵy arqyly atmosferalyq fronttar men tsıklondar ótedi. Sonyń áserinen qysqa merzimdi jańbyr, naızaǵaı, ekpindi jel jáne keı jerlerde burshaq jaýýy múmkin, — delingen aqparatta.
Odan soń temperatýra birshama qalypty deńgeıge túsedi. Maýsymnyń birinshi jartysynda túngi aýa temperatýrasy +13…+20 gradýs, kúndiz +25…+33 gradýs shamasynda bolady.
Ekinshi jáne úshinshi onkúndikterde de aýa raıy turaqsyz bolady. Túngi temperatýra +8…+25 gradýs aralyǵynda qubylsa, kúndiz +28…+39 gradýsqa deıin kóteriledi. Sonymen qatar ystyq kúnder mezgil-mezgil jańbyr men naızaǵaıǵa ulasyp otyrmaq.
Mamandar turǵyndarǵa saparǵa shyǵar aldynda jáne tabıǵat aıasyndaǵy demalysty josparlaǵan kezde aýa raıy boljamyn muqııat qadaǵalaýǵa keńes beredi. Sebebi óńirdegi meteorologııalyq jaǵdaı qysqa ýaqyt ishinde talaı ózgerýi múmkin.
Eske salsaq, osyǵan deıin Máskeýde aýa temperatýrasy rekordtyq deńgeıge jetkeni habarlanǵan.
