ShQO-da máslıhat depýtaty qarjy jymqyrdy degen kúdikke ilindi

ASTANA.KAZINFORM — QMA Shyǵys Qazaqstan oblysy boıynsha departamenti «QazConstructions» JShS basshylyǵyna qatysty, Shyǵys Qazaqstan jáne Abaı oblystarynyń 7 aýdanynda 11 áleýmettik nysannyń qurylysyna bólingen bıýdjet qarajatyn jymqyrý deregi boıynsha sotqa deıingi tergep-tekserý júrgizip jatyr.  

Kúdiktilerdiń qatarynda  «QazConstructions» JShS-niń burynǵy dırektorynyń orynbasary, Kúrshim aýdany máslıhatynyń depýtaty bar.

Atalǵan jobalar halyqtyń ómir súrý sapasyn arttyryp, azamattardyń bos ýaqytyn tıimdi ótkizýine jaǵdaı jasaýǵa baǵyttalǵan bolatyn.

— Alaıda qylmystyq áreketter saldarynan tórt dene shynyqtyrý-saýyqtyrý kesheni men 20 myńnan astam adam turatyn jeti aýyldy sýmen qamtamasyz etýge arnalǵan sý qubyry jelileri paıdalanýǵa berilmegen.

Jymqyrylǵan qarjynyń jalpy kólemi 2 mlrd teńgeden asady. Olar baılanysy bar kompanııalar arqyly qolma-qol aqshaǵa aınaldyrylǵan.

Qylmystyq jolmen alynǵan tabysqa Astanadaǵy qymbat sanattaǵy turǵyn úı keshenderinen páterler, «Lamborghini Urus», «Cadillac Escalade», «Mercedes» avtokólikteri men asyl tuqymdy jylqylar satyp alynǵan. Bul múlikke sot sanktsııasymen tyıym salyndy, — delingen QMA habarlamasynda.

Eki kúdiktige qatysty eki aı merzimge qamaýǵa alý túrindegi bultartpaý sharasy qoldanyldy.

Tergeý jalǵasyp jatyr.

Qylmystyq-protsestik kodeksiniń 201-babyna sáıkes ózge aqparat jarııa etilmeıdi. 

Aıta ketelik Qarjylyq monıtorıng agenttigi alaıaqtyqtyń jańa túri týraly eskertti.