ShQO-da maskasy joq dúken satýshylaryna aıyppul salynýda

ÓSKEMEN. QazAqparat – Shyǵys Qazaqstan oblysynyń eki qalasy men bir aýdanynda karantın talaptaryn buzǵandar anyqtaldy, dep habarlaıdy QazAqparat tilshisi.

Óńirde arnaıy qurylǵan monıtorıngilik toptar shekteý sharalarynyń saqtalýyn qadaǵalaý úshin qoǵamdyq kólikterde, dúkenderde, dárihanalar men basqa da mekemelerde kún saıyn reıdter júrgizýde.

«10 naýryzda Óskemende 197 obekti tekserildi. Nátıjesinde karantın talaptaryn buzýdyń segiz faktisi tirkelgen. Sondaı-aq monıtorıngilik toptar buryn anyqtalǵan buzýshylyqtar boıynsha aıyppul saldy. Dúken satýshylarynan kelýshilerge maskasyz qyzmet kórsetkeni úshin 393 795 teńge óndirildi», - delingen ShQO Aqparat ortalyǵy taratqan málimette.

Semeıde júrgizilgen reıdter barysynda 320 nysan qamtylǵan. Tekserýler kezinde 30 buzýshylyq tirkeldi. Onyń ishinde saýda úılerinde, bazarlarda maska taqpaǵandar jáne buqaralyq is-shara uıymdastyrǵandar boldy. 656 325 teńge somasyna 15 hattama toltyrylyp, 43 755 teńge kóleminde bir aıyppul óndirildi.

Budan bólek, Altaı aýdanynda 139 obektige reıd júrgizilip, talapty buzýdyń 6 faktisi anyqtaldy.