ShQO-da mas júrgizýshi 4 jylǵa sottaldy
ASTANA. QazAqparat - Semeı qalalyq soty jýyrda jaıaý júrginshiler ótetin jolmen ótip bara jatqan 70 jastaǵy qarııany óz kóligimen qaǵyp óltirgen júrgizýshini tórt jylǵa bas bostandyǵynan aıyrdy, dep jazady altaynews.kz
Esterińizde bolsa, 2017 jyldyń 17 sáýirinde Semeı qalasynyń turǵyny mas kúıinde kólik basqaryp kele jatyp, qart áıeldi qaǵyp ketken bolatyn. 70 jastaǵy qala turǵyny alǵan jaraqattardan qaıtys bolǵan. Tergeý barysynda kólik júrgizýshiniń mas ekeni jáne baǵdarshamnyń tyıym salynǵan túsine qaramaı, joldan ótip bara jatqan áıeldi qaǵyp ketkeni anyqtaldy.
Qylmystyq is №2 Semeı qalalyq sotynda qaraldy. Er adam sol kúni mas kúıinde jol-kólik oqıǵasyn jasaǵanyn moıyndady. Qaıtys bolǵan áıeldiń týystaryna zalal ótelmegen.
Jasalǵan qylmystyń aýyrlyǵyn eskergen memlekettik aıyptaýshy ony tórt jylǵa bas bostandyǵynan jáne osynsha merzimge kólik basqarý quqyǵynan aıyrý jazasyn taǵaıyndaýdy surady.
Sot prokýrormen kelisip, quqyq buzýshyny 4 jylǵa bas bostandyǵynan aıyrýmen, jazasyn qaýipsizdigi barynsha tómen rejımdegi túzeý mekemesinde (burynǵy kolonııa-qonysta) óteýge sottady. Sondaı-aq er adam qaıtys bolǵan zeınetkerdiń týystaryna úsh mıllıon teńge óteıtin bolady.
