ShQO-da mas kúıinde jaıaý adamdy qaǵyp óltirip, qashyp ketken júrgizýshi ustaldy
ÓSKEMEN. QazAqparat – Shyǵys Qazaqstan oblysy Kókpekti aýdanynda jaıaý júrginshini qaǵyp óltirip, sol jerden taıyp turǵan KamAZ júrgizýshisi ustaldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, oqıǵa naýryz aıynyń sońynda Preobrajenka aýylyndaǵy «Kókpekti-Vasılev ótkeli» tasjolynyń 138-shi shaqyrymynda bolǵan.
34 jastaǵy KamAZ avtokóliginiń júrgizýshisi mas kúıinde rólge otyryp, jaıaý júrginshini qaǵyp ketedi.
Osynyń saldarynan 46 jastaǵy azamat birden jan tapsyrǵan. Al júrgizýshi bolsa qylmystyq jaýapkershilikten jaltarý úshin sol jerden izin sýytady.
«Jedel-izdestirý sharalary barysynda tártip saqshylary er adamdy qolǵa túsirdi. Oǵan qatysty QR Qylmystyq kodeksiniń 346-baby 5-bóligine sáıkes sotqa deıingi tergeý amaldary júrgizilýde. Qazirgi ýaqytta birqatar saraptama taǵaıyndalǵan» dep habarlady vedomstvo ókilderi.
