ShQO-da mas kúıde rýlge otyrǵan adam ómir boıy kólik júrgizý quqyǵynan aıyryldy
ÓSKEMEN. QazAqparat – Shyǵys Qazaqstan oblysynda mas kúıde rýlge otyrǵan er adam ómir boıy kólik júrgizý quqyǵynan aıyryldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, osyǵan deıin 3 jyl merzimge kólik quralyn basqarý quqyǵynan aıyrylǵan 35 jastaǵy azamat ishimdik iship alyp «Mazda 626» avtokóligin tizgindegen. Óskemendegi Vysokovoltnaıa kóshesinde kele jatqan ol rýldi basqara almaı qarsy jolaqqa shyǵyp ketip, «VAZ 2106» kóligimen soqtyǵysqan.
Tártip saqshylary atalǵan júrgizýshige qatysty QR Qylmystyq kodeksiniń 346-baby, 2-bóligimen sotqa deıingi tergeý amaldaryn júrgizdi.
«Óskemen qalalyq №2 sotynyń úkimimen «Mazda 626» avtokóliginiń júrgizýshisi 3 jylǵa túrmege qamaldy. Sonymen qatar ol ómir boıy kólik júrgizý quqyǵynan aıyryldy. Úkim tolyqtaı zańdy kúshine engen», - dedi ShQO PD bastyǵy Saǵat Mádıev.
