ShQO-da mas kúıde kólik júrgizbeýge shaqyratyn erekshe eskertkish ornatyldy
ASTANA. KAZINFORM — Óskemen–Altaı–Rahmanov bulaǵy avtojoly boıynda, Soltústik aýylynyń mańynda mas júrgizýshiliktiń saldaryn eske salatyn erekshe art-nysan paıda boldy.
Polıtsııa bastamasymen jol jıegine bıiktigi 9 metr bolatyn bótelke pishinindegi úlken eskertkish ornatylǵan. Onyń ishinde aýyr jol apattaryna túsken, qırap-búktelgen kólikter qoıylǵan. Art-eskertkish júrgizýshilerge mas kúıinde rýlge otyrýdyń saldary qandaı bolatynyn naqty kórsetýge baǵyttalǵan.
«Bul monýment effekt úshin nemese ádemi kórinis úshin qoıylǵan joq. Ol – ómirdiń shyndyǵy. Bir ǵana qate sheshim sapardy qasiretke aınaldyra alady. JKO saldary qaı kezde de aýyr, bizdiń mindet – muny ár júrgizýshige túsindirý», - dep habarlady ShQO PD baspasóz qyzmeti.
Vedomstvo ókilderi pishin ishindegi kólikterdiń barlyǵy shynymen apatqa túskenin, mundaı jaǵdaılardyń aldyn alýǵa bolatynyn atap ótti.
«Bul kólikter – maket emes. Olar shynymen aýyr jol apattaryna túsken. Júrgizýshi osy jerden ótip bara jatyp, bir sátke oılansa eken deımiz: bir jutym alkagol adamnyń ómirine tura ma?» - dedi departament ókilderi.
Polıtsııanyń aıtýynsha, joba júrgizýshi mádenıetin qalyptastyrýǵa jáne árbir jol qozǵalysyna qatysýshynyń jeke jaýapkershiligin kúsheıtýge baǵyttalǵan.
«Apat – kenetten bolatyn jaǵdaı nemese sol kúnniń sátsizdigi emes. Kóp jaǵdaıda jol-kólik oqıǵalary tikeleı quqyq buzýshylyqtyń saldarynan bolady. Mas kúıde kólik júrgizbeý — shekteý emes, qaýipsizdiktiń qarapaıym talaby», - dep atap ótti vedomstvo ókilderi.
Polıtsııa mundaı vızýaldy eskertkishter máseleni basqasha qabyldaýǵa múmkindik beretinin jáne óńir joldaryndaǵy qaıǵyly oqıǵalardyń aldyn alýǵa kómektesetinin jetkizdi.
Buǵan deıin habarlanǵandaı, ShQO-da jol apatynan 3 adam kóz jumdy.