ShQO-da mas kúıde kólik tizgindep,polıtseılerge qarsylyq kórsetken depýtat qamaldy

ÓSKEMEN. KAZINFORM – Shyǵys Qazaqstan oblysy Tarbaǵataı aýdanynda mas kúıde kólik tizgindep, polıtsııa qyzmetkerlerine qarsylyq kórsetken depýtat 17 táýlikke qamaýǵa alyndy.

Tarbaǵataı aýdandyq máslıhatynyń depýtaty 23 jeltoqsanda alkogoldi ishimdik iship «NissanTeana» markaly avtokólik tizginine otyrǵan. Ony polıtseıler Qarasý aýyly Jeksenbi kóshesinde toqtatqan. 

Depýtat Aqjar aýylynda ornalasqan aýrýhanaǵa medıtsınalyq kýálandyrýdan ótýge barǵysy kelmeı, tártip saqshylarynyń zańdy talaptaryna baǵynbaı, qarsylyq kórsetken.

Medıtsınalyq kýálandyrý júrgizýshiniń «orta» dárejeli mas kúıde bolǵanyn kórsetti. Sot barysynda ol óz kinásin tolyqtaı moıyndady. 

- Sot sheshimimen aıyptalýshy Ákimshilik quqyq buzýshylyq týraly Kodeksiniń 608-baby 1-bóligi (Mas kúıde kólik júrgizý) jáne 667-baby 1-bóligi (polıtseıdiń zańdy talabyna baǵynbaý) boıynsha kináli dep tanylyp, 17 táýlikke qamaýǵa alyndy. Sondaı-aq 7 jyl merzimge kólik quralyn basqarý quqyǵynan aıyryldy, - delingen aýdandyq sot úkiminde.

Eske salsaq, osyǵan deıin Aqtóbe polıtsııasynyń jol boıynda bılegen balalardy tasymaldaǵan júrgizýshini jazalaǵany habarlanǵan.