ShQO-da mas kúıde kólik júrgizgen 68 adam anyqtaldy
ÓSKEMEN. QazAqparat – Shyǵys Qazaqstan oblysynda bir aıda mas kúıde kólik júrgizgen 68 adam anyqtaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda jol-kólik oqıǵalaryn azaıtý jáne joldaǵy qaýipsizdikti arttyrý maqsatynda arnaıy aılyq ótkizip jatyr.
20 kún ishinde polıtseıler 10 myńnan astam jol qozǵalysy erejelerin buzý faktisin anyqtady. Onyń 100-den astamyn qoǵamdyq kólik júrgizýshileri jasaǵan.
«Sonymen qatar mas kúıde kólik tizgindegen 68 júrgizýshi ustaldy. Qarsy jolaqqa shyqqany úshin – 47, manevr jasaý erejelerin buzǵany úshin – 1212, baǵdarshamnyń qyzyl túsine ótkeni úshin – 124, apattyq jaǵdaı týǵyzǵany úshin - 912 jáne temirjol ótkelderinen ótý erejelerin buzǵany úshin – 18 júrgizýshi jaýapqa tartyldy», - delingen aqparatta.
Budan bólek, qaýipsizdik beldigin taqpaǵan 1279, kólik basqarý kezinde uıaly telefon paıdalanǵan 1024 adam tirkeldi. Jaıaý júrginshige jol bermegen 746 júrgizýshige aıyppul salynǵan.
