ShQO-da maral sharýashylyǵy isi boıynsha sottalǵan 6 adam aqtalyp shyqty

ÓSKEMEN. KAZINFORM – Shyǵys Qazaqstan oblystyq sotynyń qylmystyq ister jónindegi sot alqasy 5 jylǵa sozylǵan tergeýden keıin maral sharýashylyǵy isi boıynsha sottalǵandardy aqtady. 

2025 jylǵy 17 qarashada Samar aýdandyq soty alty aıyptalýshyny asa iri kólemde alaıaqtyq jasaǵany úshin kináli dep tanyǵan bolatyn. Olardyń úsheýi urlyq jasaǵany úshin de sottalǵan.
Aıyptaý nusqasyna sáıkes, aldyn ala sóz baılasqan sottalýshylar Altaı aýdany Maleev aýyldyq okrýgine qarasty Pýtıntsevo aýylyndaǵy maral sharýashylyǵyna quqyqty zańsyz ıelengen. Keltirilgen zalal 80 mln teńgege baǵalanǵan. Sondaı-aq úsh aıyptalýshy sharýashylyq aýmaǵynan eki traktordy, bir tirkemeni jymqyrdy dep aıyptaldy.

Ol kezde barlyq alty adamǵa 5 jylǵa bas bostandyǵynan aıyrý jazasy taǵaıyndalyp, sottalǵandardyń birine qatysty jazany óteý keıinge qaldyrylǵan edi. Alaıda apellıatsııalyq sot bul sheshimdi teriske shyǵardy. 

– Sotqa deıingi tergeý zańda kózdelgen negizder bolmaǵan jaǵdaıda bastalǵan. Raportty tirkeý kezinde jáne tergeýdi toqtatý týraly qaýlylardyń kúshin joıý barysynda eleýli zańbuzýshylyqtar jiberilgen. Osylaısha, bul aldyn ala tergeýdiń jaramsyz dep tanylýyna ákelip soqty, - delingen sot alqasynyń qaýlysynda. 

Qylmystyq isti qozǵaýǵa negiz retinde jábirlenýshiniń 2019 jylǵy 2 qazanda «Driada VK» JShS-men jasalǵan múliktik keshendi satyp alý-satý sharty boıynsha mindettemelerdiń oryndalmaýy týraly aryzy alynǵan. Alaıda sot barysynda belgili bolǵandaı, atalǵan shart belgilengen tártipke sáıkes jaramsyz nemese jalǵan dep tanylmaǵan.

Sot alqasy Qylmystyq-protsestik kodekstiń 179-babyna sáıkes, eger azamattyq-quqyqtyq mámileler jaramsyz dep tanylmasa, olardy oryndamaýǵa baılanysty aryzdar qylmystyq quqyqbuzýshylyq retinde tirkelmeýi tıis ekenin atap ótti.

– Atalǵan is boıynsha tergeý 2020 jyldyń qazan aıynan bastap 5 jylǵa jýyq ýaqyt júrgizilgen. Osy kezeńde qylmys quramynyń bolmaýyna baılanysty is 8 ret toqtatylǵan. Alaıda tıisti qaýlylar ne oblystyq prokýratýra tarapynan bekitilmegen, ne keıinnen kúshin joıyp otyrǵan. Apellıatsııalyq sot 2020 jylǵy 26 jeltoqsandaǵy, 2021 jylǵy 19 shildedegi jáne 2022 jylǵy 24 qazandaǵy tergeýdi toqtatý týraly qaýlylardyń kúshin joıýdy zańsyz dep tanydy, - delingen aqparatta. 

Aqtalǵan azamattar sot zalynda qamaýdan bosatyldy. Endi olardyń zańsyz qylmystyq jaýaptylyqqa tartylý saldarynan keltirilgen zııandy óteýge quqyǵy bar. 

Eske salsaq, osyǵan deıin Óskemen áýejaıynan 140 mln teńgeden astam qarajat jymqyrǵandarǵa sot úkimi shyqqany habarlanǵan.