ShQO-da Máńgilik alaýǵa taýyq qýyrǵandar izdestirilip jatyr

ÓSKEMEN. KAZINFORM — Shyǵys Qazaqstan oblysy polıtsııasy Rıdder qalasyndaǵy Máńgilik alaýda taýyq qýyrǵandardy izdestirip jatyr.

Ekinshi dúnıejúzilik soǵystan oralmaǵan jaýyngerlerdiń aty-jónderi qashalyp jazylǵan Máńgilik alaýda belgisiz bireýler taýyq qýyrǵan. Bul týraly kýáger polıtsııaǵa habarlady. 

Áıel adam fotosýretti áleýmettik jelide de jarııalady. Memorıalda beınebaqylaý kameralary ornatylǵanyna qaramastan, bundaıǵa kimderdiń barǵanyn ázirge anyqtaý múmkin bolmaı otyr.

— Atalǵan fakti polıtsııa bóliminde tirkeldi. Qazirgi ýaqytta quqyqbuzýshylardyń kim ekenin anyqtap, olardy jaýapkershilikke tartý maqsatynda jedel-izdestirý jáne protsessýaldyq sharalar júrgizilip jatyr. Polıtsııa qyzmetkerleri mańaıdaǵy aýmaqtardy aralap, beınebaqylaý jazbalaryn zerdelep, kýágerlerden túsinikteme alýǵa kóshti, — dep habarlady ShQO Polıtsııa departamentinen.

Osy rette polıtseıler qala turǵyndaryna tarıhı-mádenı eskertkishterdi, ǵımarattar men qurylystardy qorlaǵandarǵa ákimshilik te, qylmystyq ta jaýapkershilik qarastyrylǵanyn eskertti.

Eske salsaq, osyǵan deıin Prezıdent vandalızmdi qabyldaýǵa bolmaıdy, buzaqylardy zań boıynsha jaýapkershilikke tartý kerek ekenin basa aıtqan edi.