ShQO-da MÁMS júıesinde saqtandyrylǵan turǵyndar úlesi 80 paıyzdan asty

SEMEI. QazAqparat – Shyǵys Qazaqstan oblysynda MÁMS júıesinde saqtandyrylǵan turǵyndar úlesi 80 paıyzdan asty, dep habarlaıdy QazAqparat tilshisi.

Bıyl óńir boıynsha jurtshylyqqa medıtsınalyq kómek kórsetý úshin 122 mlrd teńge bólingen. Onyń ishinde Semeıge 54 mlrd teńge jumyldyrylǵan.

Bul týraly qalalyq Aqparat ortalyǵynda ótken baspasóz máslıhaty barysynda Áleýmettik medıtsınalyq saqtandyrý qory ShQO fılıalynyń dırektory Ǵalymjan Ábilov aıtyp berdi.

«MÁMS júıesinde saqtandyrylǵan adam sany oblys boıynsha 1 124 841-di qurap otyr. Bul jalpy aımaq halqynyń 80,9%-y. Ótken jylmen salystyrǵanda saqtandyrylǵan azamattardyń sany 2%-ǵa artqan», - dedi ol.

Ǵalymjan Ábilovtiń aıtýynsha, Shyǵys Qazaqstanda sońǵy bir jylda emhanaǵa turǵyndar 4,4 mln ret barǵan. Táýlik boıy jumys isteıtin statsıonarlarda 143 myń naýqas em qabyldasa, kúndizgi statsıonarlarda 70 myń naýqasqa kómek kórsetilgen.